[I]n nomine sancte [et individue trinitatis]. Henricus divina favente clementia [quartus] Romanorum imperator augustus. Omnibus Christi nostrique fidelibus tam futuris quam presentibus notum fieri volumus, quoniam partem ville, que vocatur Sennin, quam Willebertus Hoyensi ecclesie contulerat et comes Lambertus ad usus Arnulphi iniuste invaserat, liberam fecimus eamque perpetuo iure habendam fratribus eiusdem ecclesie concedimus et id ratum firmumque augusta auctoritate precipimus. Si quis autem episcopus aut comes aut alia quelibet regni nostri magna vel parva persona hoc preceptum violare presumpserit, banno nostro subiaceat et noster inimicus inrecuperabiliter existat. Ut autem hoc ab omnibus credatur et omni evo inviolabile permaneat, hanc cartam inde conscriptam et manu propria corroboratam impressione nostri sigilli, ut apparet inferius, iussimus insigniri.

Datum XI. kl. novembris, indictione IIII, anno dominice incarnationis millesimo CXI, regnante Henrico quinto rege Romanorum anno VI, imperante primo; actum est Maguntie; in Christo feliciter amen.