(C.) In nomine sanctae et individuę trinitatis. Heinricvs divina favente clementia quartus Romanorum imperator augustus. Omnibus nostri ac futuri temporis Christi fidelibus presentatum et presentandum volumus, quia cartam, qua avus noster beatę memorię II. imperator Heinricus curtem quandam nomine Vilmar in pago Lggonahi sitam pro salute animę suę sancto Evchario Treueri in proprietatem donavit et confirmavit, nos precibus domni Brvnonis Treuerensis archiepiscopi et Ebrehardi eiusdem loci abbatis renovamus et sigilli nostri impressione hunc modum tenentem similiter corroboramus: In nomine sanctę et individuę trinitatis et reliqua. Omnium Christi nostrorumque fidelium tam futurorum quam etiam presentium sollers noverit industria, qualiter nos venerabilis Ebrehardi Treuirensis archiepiscopi caritativam benignitatem poposcimus, quod nostrę voluntati aliqua sanctarum reliquiarum consolatione satisfaceret et tali thesauro monasterium nostrum ditaret, quod Goslarię in honore sanctę Marię perpetuę virginis et sanctorum apostolorum Simonis et Ivde a fundamento incepimus et deo adiuvante perfecimus. Quam videlicet petitionem ille venerabilis iamdictus presul fideliter adtendens corpus sancti confessoris Valerii archiepiscopi cum aliis quamplurimis sanctorum reliquiis nobis benigne et honorifice apportavit. Quod, ut iustum erat, suscipientes summa devotione in predicto monasterio dei suique servicio inibi pleniter et canonice ordinato, prout potuimus, cara pignora venerabiliter recondidimus. Sed ne sanctus Evcharivs tali successore tamque amabili consocio absque omni remuneratione de nostra parte careret ideoque nobis implorantibus auxilii sui gratiam non impenderet, prebendam monachorum deo sanctoque Evchario regulariter servientium aliquantulum augeri desideravimus, ut eo melius et delectabilius vigilarent in dei laudibus. Quapropter ob honorem ipsius gloriosi confessoris Valerii necnon per interventum Agnetis nostri thori ac regni karissimę consortis et propter dilectionem fidelis nostri archiepiscopi superius iam nominati, qui in hoc tam magno tamque preclaro munere assensum prebuit nostrę voluntati, et pro animę nostrę felicitate prolisque dilecte prosperitate et antecessorum nostrorum requie ad altare eiusdem sancti Eucharii Treueri situm in augmentum prebendę fratrum inibi servientium de nostrę hereditatis parte villam quandam, que vocatur Vilmar, in pago Logenahi et in comitatu Goteboldi comitis sitam, cum omnibus suis pertinentiis, hoc est utriusque sexus mancipiis, tributariis, ecclesiis, areis, edificiis, terris cultis et incultis, agris, vineiis, pratis, pascuis, campis, silvis, venationibus, aquis aquarumque decursibus, molis, molendinis, piscationibus, exitibus et reditibus, viis et inviis, quesitis et inquirendis et cum omni iure et utilitate, quali nos predictam curtem antea habuimus, et quicquid ullo modo inde poterit provenire, in proprium dedimus atque tradidimus, eo scilicet tenore, ut abbas de predicto monasterio liberam deinceps potestatem habeat de prenotata curte tenendi, commutandi, precariandi vel, quicquid sibimet placuerit cum consilio fratrum, in usum ecclesię inde faciendi et nichilominus advocatiam, cui et quamdiu vult, committendi. Et ut hęc nostra imperiali auctoritate facta traditio stabilis et inconvulsa omni permaneat ęvo, hoc preceptum inde conscriptum manu propria corroborantes sigilli nostri impressione iussimus insigniri.

Signum domni Heinrici quartir (!) Romanorum imperatoris invictissimi. (M.7.) (SI.3.)

Albertus Maguntinus archiepiscopus et archicancellarius recognovit.

Data XI. kl. novemb., indictione IIII, anno dominicę incarnationis millesimo CXI, regnante Heinrico quinto rege Romanorum anno VI, imperante primo; actum est Maguntię; in Christo feliciter amen.