(C.) In nomine sanctae et individuae trinitatis. Heinricus divina favente clementia quintus Romanorum rex. Novimus corda regum in manu dei esse et ideo, cum eius gratia in regem sublimati simus, opera pietatis maxime circa domesticos fidei vigilanti studio debemus exercere. Per hoc enim et regnum nostrum in pace stabilietur et post cursum huius vitae pax nobis aeterna hoc merito concedetur. Quapropter omnibus Christi nostrique fidelibus tam futuris quam presentibus notum fieri volumus, qualiter nos causa dei et ob aeternum animę nostrae nostrorumque parentum remedium, rogatu et consilio Ebrardi Eistetensis episcopi, Alberti nostri dilecti cancellarii, Bertoldi ducis, Beringarii comitis, Godefridi comitis aliorumque multorum nostrorum fidelium et ob humilem petititionem Wiberti monachi monasterio in honore beatorum apostolorum Philipi et Iacobi sanctaeque Walbvrgis ab eodem constructo in silva Heiligeforst, in episcopatu Strazburgensi, terram abundanter ad tria aratra, duo inter aquas Crewenbach et Eberbach et unum circa monasterium, in proprietatem concessimus et concedendo firmavimus. Concessimus etiam ibidem deo servientibus usum eiusdem silvę tam ad ędificandum quam ad calefaciendum ad eorum libitum et usum aquarum ad piscandum et ad suum commodum faciendum et pascua eorum animalibus per totam silvam. Eundem quoque locum et omnia bona mobilia et immobilia intus et extra ad illum pertinentia sub tutelam nostrae defensionis misericorditer ad dei honorem suscepimus. Ut autem hoc omni ęvo inviolabile permaneat et credatur ab omnibus, hoc inde privilegium fieri decrevimus, quod manu propria corroboratum impressione nostri sigilli insigniri iussimus.

Signum domni Heinrici quinti Romanorum regis invictissimi. (M.1.)

Albertus cancellarius vice Rottardi Maguntini archiepiscopi recognuit. (SI.1.)

Data XVI. kl. nov., indictione XIIII, anno dominice incarnationis millesimo CVI, regnante Heinrico V. rege Romanorum anno I, ordinationis eius VII; actum est Spire; in Christi nomine feliciter amen.