(C.) In nomine sanctae et individuę trinitatis. Heinricus divina favente clementia rex. Adiuvant celestis regis clementia sanctarum loca ęcclesiarum detinenda censemus et promovenda. Qua spe familia sancti Adalberti de parrochia Olnę, quę sita est in pago Ardennę, conductu prepositi Teoderici et fratrum ad nostrum auxilium confugit, verbera, rapinas et multas iniurias á subadvocatis eis illatas nobis deploravit. Condolentibus itaque tam principibus quam episcopis illorum miseriis et admirantibus super inauditis iniuriis iudicatum est in presentia nostra, quia post ducem unum solum advocatum, qui bannum habeat á nobis, debeant habere et in tribus solummodo placitis generalibus in anno debeant eum suscipere et servitium ei dare. Si vero ipse legitimus advocatus voluerit, consilio prelati nuntium sub se constituere poterit, qui tamen nec sit advocatus nec ius placiti habeat, sed iustum servitium domini sui recipiat. Huic iudicio affuerunt et consenserunt: archiepiscopus Coloniensis Fredericus; episcopi: Leodicensis Obertus, Monasteriensis Borchardus; dux Heinricus de Lemburch; comites: Wibertus de Saxonia, Berengarius de Solzbac, Arnulfus de Los; liberi homines: Giselbertus de Duraz, Arnulfus de Rode, Giselbertus de Grules, qui erat legitimus eorum advocatus. Facto itaque et diffinito iudicio precipiendo interdiximus advocato Giselberto, ne ulterius superponeret eis subadvocatum nec contra iusticiam requireret ab eis servitium aut placitum. Tale est autem servitium, quod ei debetur in tribus generalibus placitis per annum: XIIcim maldra tritici et XXXta et I maldrum avenę, VIIIto porci et IIIIor porcelli, VIIIto friskingę ovinę, XXXta et VI pulli, XVcim solidi ad vinum. Si vero aliquis pro culpa ab advocato deprehensus fuerit, consilio ministrorum debet eum tractare, non penitus confundere. Et ut hęc nostrę confirmationis pagina stabilis et inconvulsa permaneat, eam manu propria roborantes sigilli nostri impressione iussimus insigniri.

Signum domni Heinrici quinti (M.) regis invictissimi.

Albertus cancellarius vice Rothardi archicancellarii recognovi. (SR.)

Data idus aug., indictione VIIII, anno incarnationis dominicę MCIII, anno autem domni (SP.D.) Heinrici quinti ordinationis eius XIII; actum Aquisgrani; feliciter amen.