(C.) In nomine sanctae et individue trinitatis. Heinricus divina favente clementia quartus Romanorum imperator augustus. Quoniam a deo omnium rerum inspectore meritam et condignam retributionem nos recipere minime dubitamus, si nostrę regalis munificentię benivolentiam deo devote servientium petitionibus clementer ac benigne accomodamus, volumus, ut omnium sanctę dei ecclesię nostrorumque fidelium tam futurorum quam presentium diligens industria noscat, qualiter nos pro remedio animę nostrę nostręque genitricis beate memorię Bertę et ob incrementum regni nostri canonicorum sanctę Cremonensis ęcclesię in honore beatissimę dei genitricis Marie constructę necessitatibus providentes illis confirmamus ac nostra regali auctoritate corroboramus terras suas, quas prefatę canonicę presules eiusdem ęcclesię vi et iniuste olim tulerant, scilicet Bvtaningvm, Castrum Uetus, Insulam, Radaldiscvm, Casam Nouam, Bvtalianvm, Acenellum, Fontanellam, capellam sancti Saluatoris necnon oratorium sancti Mauritii cum eorum pertinentiis, altare quoque sancti Ymerii confessoris cum eiusdem altaris oblationibus et omnibus ad idem pertinentibus, nec minus et cęteras terras, quas canonici predicti in Cremonensi episcopatu vel alicubi secundum instrumenta cartarum vel documenta legum nunc vel in futuro iuste ac legaliter per loca detinere videntur, cum districtu, cum porcis et vervecibus, cum operibus et albergariis et omnib[us] scuphiis. Preterea sanccimus atque precipimus, ut nullus episcopus, comes, procurator aut decanus aut portinarius de ipsa canonica aut de terris eiusdem canonicę fodrum aut aliquas dationes seu albergariam illis tollere aut eos de ipsis terris seu altari predicto sine legali iudicio molestare vel disvestire presumat. Si quis vero contra huius nostrę confirmationis auctoritatem temerarius violator occurrerit, centum libras auri optimi componat, medietatem imperiali camere nostrę et medietatem predictis canonicis. Hoc autem ut verius credatur firmiusque ab omnibus teneatur, hanc sedulam (!) inde conscriptam manu propria corroborantes sigilli nostri impressione precipimus insigniri.

Signum domni Henrici quarti Romanorum imperatoris invictissimi. (M.7.)

Burcardus Monasteriensis episcopus et cancellarius vice Alberti archicancellarii, Maguntine sedis electi, recognovit. (SI.D.)

Data XIIIIo kl. iunii, indictione IIII, anno dominicę incarnationis millesimo CXI, regnante Heinrico quinto rege Romanorum anno V, imperante primo, ordinationis eius XI; actum est Veronę; in Christo feliciter amen.