(C.) In nomine sancte et individue trinitatis. Heinricus divina favente clementia quartus Romanorum imperator augustus. Omnibus Christi nostrique fidelibus tam futuris quam presentibus notum fieri volumus, qualiter nos rogatu et consilio Friderici Coloniensis archiepiscopi et comitum Herimanni de Saxonia, Berengarii de Sulcebach, Godefridi de Caloen aliorumque multorum nostrorum fidelium Iacobum, Hardicionem et fratres eorum cum omnibus castellis ipsorum, scilicet Bulgare, Cossatum, Adengi, castrum Lauresatum et Occeningum cum omnibus aliis bonis eorum tam adquisitis quam adquirendis sub tutelam nostre defensionis per hanc preceptalem paginam suscepimus. Ad hoc etiam concessimus eis in feudum propter fidelitatem eorum retinendam et bonum servicium remunerandum, quod nobis Rome sepe fecerunt et in aliis locis, triginta libras Mediolanensis monete veteris in portu Sicide Palestrensi, precipientes, ut hoc feudum libere teneant et habeant absque ulla contradictione omni tempore. Si quis igitur dux, marchio, comes, vicecomes, episcopus, archiepiscopus vel alia quelibet persona magna vel parva eos aliquo ingenio aliquove modo de his omnibus supradictis inquietare vel molestare temptaverit vel hanc paginam violare presumpserit, mille libras auri boni compositurus banno nostro subiacebit, medietatem nostre camere et medietatem predicto Iacobo et fratribus eius. Ut autem hoc credatur ab omnibus et omni evo inviolabile permaneat, hanc cartam inde conscriptam impressione nostri sigilli insigniri iussimus.

Signum domini Heinrici quarti Romanorum imperatoris invictissimi.

Burcardus Monasteriensis episcopus et cancellarius vice Alberti archicancellarii, Maguntine sedis electi, recognovit.

Data XIIII. kl. iunii, indictione IIII, anno dominice incarnationis millesimo CXII, regnante Heinrico V. rege Romanorum anno V, imperante primo, ordinationis eius XI; actum est Verone; in Christo feliciter amen.