Die Urkunden Heinrichs V. und der Königin Mathilde
<<74.>>

Heinrich nimmt das von den Bürgern der Stadt erbaute und dem Hl. Stuhl unterstellte Kanonikerstift Sant’Agata in der Vorstadt von Cremona in seinen Schutz, bestätigt seine Besitzungen und befreit es von fremdem Fodrum oder sonstigen Abgaben.

Bei Verona, 1111 Mai 19.

In nomine sanctę et individuę trinitatis. Heinricus divina favente clementia quartus Romanorum imperator augustus. Inter tot curas et sollicitudines, quot pro fidelium regimine sub imperii nostri sceptro degentium sustinemus, eximię actionis et magnę mercedis esse credimus in dei causa laborantibus nos adiutores existere ipsorumque pia vota roborantes modis quibus possumus animare. Quapropter omnibus Christi nostrique fidelibus tam presentibus quam futuris notum fieri volumus, qualiter Dominicus prepositus venerabilis ecclesię sanctę Agathę in suburbio Cremonensis civitatis sitę, quam eiusdem civitatis cives dei timore et animarum suarum remedio de suis propriis ędificaverunt et ędificatam beatorum apostolorum principibus per cartam oblationis tradiderunt, suppliciter nostram imploravit clementiam, quatinus ecclesiam pręnominatam eiusque bona pro caritate dei nostrique imperii statu et sanctę Romanę ecclesię reverentia, ad quam specialiter pręfata ecclesia pertinet, et amore nostrorum principum, Frederici videlicet Coloniensis archiepiscopi, Alberti dilecti nostri cancellarii et Hermanni comitis de Saxonia, aliorumque multorum nostrorum fidelium et etiam civium Cremonensium, in nostram susciperemus defensionem. Cuius dignis petitionibus et interventu eorundem nostrorum fidelium et pręcipue pro sanctę matris Romanę ecclesię dilectione aures accomodantes nostrę defensionis largiti sumus decretum sicque servis dei inibi degentibus per hanc pręceptalem paginam nobis placuit inferre iuvamen. Itaque omnia, quę ad eandem ecclesiam vel ad eiusdem ecclesię xenodochium pertinere videntur, tam intra muros eiusdem civitatis quam extra, prope vel longe, in domibus scilicet, clausuris, vineis, municipiis, domicultibus, mansis seu villis, ut est in Monticello, qui dicitur Wiberti, et in curte Aquęlongę cum castro et omnibus per eandem curtem sibi pertinentibus, insuper villam, quę dicitur Campus Macer, cum ecclesia sancti Christophori ibi constructa et cum omnibus tam cultis quam incultis, silvis et aquis, quę pręfata ecclesia sanctę Agathę ibi possidere videtur, et in Augia ecclesiam sanctę Valerię cum duodecim terrę iugeribus, quin etiam universa mobilia et immobilia, in servis et ancillis, vineis, campis, redditibus, fictis, pratis, pascuis, paludibus, silvis, stallareis, terris fertilibus vel sterilibus, cultis et incultis, piscationibus, molendinis, lacubus seu stagnis, sive decimis et terris fictaliciis et universis, quę ad ius eiusdem ecclesię redduntur vel referuntur, in nostrę tuitionis mundiburdio suscipientes perpetua stabilitate firmamus, ita ut nulli umquam sit licentia pręfatam ecclesiam sanctę Agathę disvestire de omnibus, quę nunc habet vel inantea deo annuente acquirere potuerit, eo scilicet ordine, ut nullus archiepiscopus, episcopus, abbas, dux vel marchio, comes, vicecomes, sculdassio, castaldio vel actionarius quislibet sive quęvis summa vel infima cuiuslibet gradus vel dignitatis persona aliquam violentiam, molestiam aut lęsionem manifestis vel clandestinis molitionibus per se suppositave persona in aliquibus rebus inferre audeat aut prępositum vel canonicos eiusdem loci inquietare pręsumat. Pręcipimus insuper, ut nullus mortalium a supradicta ecclesia vel ab his, quę ad eam pertinent, fotrum vel alicuius debiti conditionem requirere audeat, nisi nosmetipsi propius accedentes eam nobis servire iubeamus. Quodsi quis huic nostrę auctoritatis et promissionis pręcepto nisus fuerit refragari, resistere aut contradicere, inretractabili et inevitabili iudicio sancimus debere illum pro pęna solvenda mille auri optimi libras componere, medietatem nostrę camerę et pręposito atque canonicis alteram medietatem. Et ut nostri pręcepti confirmatio atque corroboratio firma et inconvulsa omni ęvo permaneat, hanc cartam nostro iussu [con]scriptam sigilli nostri impressione insigniri iussimus.

Signum domni Heinrici quarti (M.7.) Romanorum imperatoris invictissimi.

Burchardus Monasteriensis episcopus et cancellarius vice Alberti archicancellarii, Magontinę sedis electi, recognovi.

Data XIIII. kal. iunii, indictione III, anno dominice incarnationis millesimo centesimo undecimo, regnante Heinrico quinto rege Romanorum anno quinto, imperante autem primo, ordinationis eius XI; actum est iuxta Veronam; in Christo feliciter amen.