(C.) In nomine sancte et individue trinitatis. Henricus divina favente clemencia quartus Romanorum imperator augustus et palatinus. Omnibus Christi nostrique fidelibus tam futuris quam presentibus notum fieri volumus, qualiter nos digno interventu et consilio Frederici Coloniensis archiepiscopi et episcoporum: Arthuici Ratisponensis, Ottonis Bauembergensis, [E]brardi Eistetensis, Seyfredi Vercellensis, necnon Welfonis ducis et marchionum: Rainerii de Monteferrato et Manfredi de Romagnano, pariterque comitum: Alberti de Blandrato, Vidonis de Canauixio, aliorumque multorum nostrorum fidelium publicam stratam, que de ultramontanis partibus per burgum sancti Ambroxii Romam tendit, eundo et redeundo, Taurinensi civitati et omnibus eius incolis propter eorum fidelitatem retinendam, quam semper nobis ac fideliter observaturi sunt, et iusticiam transeuncium peregrinorum ac negociatorum per hanc preceptalem paginam concessimus atque firmavimus. Precipimus igitur, ut nullus dux, marchio, comes, vicecomes aut alia quelibet persona magna vel parva, cuiuscumque condicionis fuerit, supradictam urbem vel eius incolas inde molestare audeat. Quod si quis facere presumpserit, mille libras auri optimi compositurus banno nostro subiacebit, medietatem camere nostre et medietatem supradictis civibus. Ut autem hec nostra concessio ab omnibus credatur et omni evo inviolabilis permaneat, hanc inde cartam conscriptam impressione nostri sigilli insigniri iussimus.

Signum domini Henrici quarti Romanorum imperatoris (M.7.) invictissimi.

Data X. kl. aprilis, indicione tercia, anno dominice incarnacionis MCXI, regnante Henrico quarto imperatore Romanorum anno Vo, imperante primo, ordinationis eius XI; actum est Sutr[i]e; in Christi nomine amen.