a) Ego Heinricus rex ab hac hora inantea non ero in facto aut consilio, ut dominus papa Paschalis II. perdat papatum Romanum vel vitam vel membra, vel capiatur mala captione, aut per me aut per summissam personam, nec ipse nec fideles ipsius, qui pro ipso securitatem mihi fecerunt vel fecerint, idest Petrus Leonis cum filiis suis et Walfredus, quorum bona damnum studiose non patiantur, vel alii, quos dominus papa mihi significaverit; et si quis domino pape vel eis fecerit, ego eos fideliter adiuvabo. Legatos, quos ad me dominus papa miserit, in eundo et redeundo securos faciam tam a me quam a meis. Et si eis nescienter iniuria inlata fuerit, ad emendandum fideliter adiuvabo. Sic observabo domino pape sine fraude et malo ingenio, si dominus papa proximo die dominico sic adimpleverit mihi, sicut in conventionis carta scriptum est. Sic me deus.

b) Ego Fredericus dux, ego Ingelbertus marchio, ego Theobaldus marchio, ego comes Herimannus, ego Fredericus palatinus comes de Saxonia, ego Beringarius comes de Bauaria, ego Godefridus comes, ego Fridericus Saxo, ego Cuono frater Beringarii, ego Sygeboto de Bauaria, ego Heinricus dux de Carinthia, ego Bertoldus filius ducis Bertoldi, ego Albertus cancellarius non ero in facto aut consilio, ut dominus papa Paschalis II. perdat papatum Romanum vel vitam vel membra, vel capiatur mala captione. Et si rex iuramentum hoc et ea, que in carta conventionis scripta sunt, non observaverit, ego cum honore meo ad dominum papam et ad Romanam ecclesiam me tenebo. Sic observabo domino pape sine fraude et malo ingenio, si dominus papa sic adimpleverit domino nostro regi proximo die dominico, sicut in conventionis carta scriptum est.

Actum Sutrii in burgo, quinto idus februarii.