a) Rex scripto refutabit omnem investituram omnium ecclesiarum in manu domini papę, in conspectu cleri et populi, in die coronationis suę. Et postquam dominus papa fecerit de regalibus, sicut in alia carta scriptum est, sacramento firmabit, quod numquam se de investituris ulterius intromittet. Et dimittet ecclesias liberas cum oblationibus et possessionibus, quę ad regnum manifeste non pertinebant. Et absolvet populos a iuramentis, quę contra episcopos facta sunt. Patrimonia et possessiones beati Petri restituet et concedet, sicut a Karolo, Lodouico, Heinrico et aliis imperatoribus factum est, et tenere adiuvabit secundum suum posse. Non erit in facto aut consilio, ut dominus papa perdat papatum Romanum vel vitam vel membra, vel capiatur mala captione, aut per se aut per summissam personam, nec ipse nec fideles ipsius, qui pro ipso securitatem ei fecerint, idest Petrus Leonis cum filiis suis, quorum bona dampnum studiose non patiantur, vel alii, quos regi significaverit; et si quis ei vel eis fecerit, rex eos fideliter adiuvabit.

b) Pro huius securitatis observatione mediatores dabit rex domino pape principes, quos petiit, idest Fridericum filium sororis suę, marchionem Engilbertum, marchionem Thiebaldum, comitem Hermannum, Fridericum palatinum comitem de Saxonia, Beringarium de Bauaria, comitem Godefridum, Fridericum Saxonem, Albertum cancellarium, Cononem fratrem Beringarii, Sigebot de Bauaria, Heinricum ducem Carinthię, Bertoldum filium ducis Bertoldi. Qui iurabunt domino papę securitatem de vita, de membris, de papatu, de captione. Et si rex hęc omnia suprascripta non observaverit, ipsi cum honoribus suis ad dominum papam et ad Romanam ecclesiam se tenebunt. Obsides pro securitate domini pape dabit rex proxima quinta feria, et secure mittet ad Insulam in potestate domini papę Fridericum ducem, nepotem suum, Brunonem Spirensem episcopum, Chonradum nepotem comitis Herimanni, et filium, Heinricum fratrem comitis Friderici. Obsides si receperit, reddet in die coronationis suę transito ponte. Et si forte coronatus non fuerit aut non transierit, similiter reddet apud castellum sancti Angeli. Legatos autem, quos dominus papa ad eum miserit, in eundo et redeundo securos faciet tam a se quam a suis. Et si eis nescienter iniuria illata fuerit, ad emendandum fideliter adiuvabit.