Heinricus dei gratia Romanorum rex consulibus et senatui, populo Romano, maioribus et minoribus, gratiam suam cum bona voluntate. Divina disponente gratia postquam regnum patrum nostrorum intravimus, Urbem, caput et sedem nostri imperii, pio affectu visere optavimus et eam more magnorum predecessorum exaltare, honorare et ditare, ut dominus fideles, ut pater filios, ut civis concives, decrevimus. Huius autem propositum desiderii non voluntas, verum diversa diuque disturbata retardavere regni negocia. Quibus tandem dei nobis favente clementia sedatis, compositis, subiectis, expediti in Italiam venimus illamque pre ceteris terris discordem et divisam pro tempore ad iusticiam et concordiam coegimus. Ad vos ergo properantes et iam diu desideratum inceptum ad effectum perducere conantes, ut legati nostri iussu vestro laudaverunt nosque invitati sumus, ecclesię et ab ecclesia, vobis et a vobis, pro facienda et recipienda iusticia pacifice venimus. Volumus, quatinus idoneos nuncios, vestrę utilitatis providos et nostri honoris devotos, nobis obviam mittatis, quorum consilio et nostrorum unito ad vos, vobis commodi et nobis, apertius veniamus.