(C.) In nomine sanctae et individuę trinitatis. Heinricus divina favente clementia quintus Romanorum rex. Ad hoc nobis divina gratia imperii fastigium contulisse credimus, ut clementie nostre meritum cunctiformiter in his, quę pietatis sunt, accumulemus. Ideoque omnium fidelium sancte dei æcclesie nostrorumque presentium ac futurorum devotio noverit, qualiter nos pro dei amore animeque nostre remedio canonicos sancte Aretine æcclesie nostram adeuntes regiam potestatem de renovatione atque confirmatione privilegii, quod eis Heinricus imperator, pater noster beate memorie, contulerat. Quorum petitionibus, quia nobis iustum visum est, annuentes ob salutem anime nostre nostrorumque parentum et pacem et stabilitatem regni nostri et pro amore beati Donati martiris atque pontificis, rogatu seu interventu nostrorum principum, paternum privilegium renovavimus et confirmavimus atque augmentavimus, sicut per ordinem inferius legitur. Inprimis plebem sancte Marie in gradibus cum omnibus suis pertinentiis, et omnes terras, quas cives retinent sine eorum voluntate, et terram de hospitale sancti Angeli et omnes terras, quas per cartas legitime adquisiverunt vel adquisituri sunt, in Montagnano, Lucignano et Oliueto, in Bulgari et Casauetere, in Quarata et Campauana, in Modiona et Calbenzano, et quicquid habent in Anglare et quod [ibi iuste ad]qui[s]ituri sunt, in comitatu vero Castellano: Ripule, Pitilianum, Silce, et curtem de sancto Andrea et castrum de Milisciano cum omnibus suis pertinentiis, plebem sancti Uiti in Corsignano similiter cum omnibus pertinentiis suis, et omnes plebes <et æcclesias>, quas habent in comitatu Senensi, et omnes terras, quas habent in comitatu Aretino, Castellano, Clusino et Senensi vel inantea adquisituri sunt. Necnon confirmamus eis omnem illam terram, quam antecessores nostri imperatores et reges seu et alii fideles christiani prefatis canonicis æcclesie Aretine, in qua pretiosissimum corpus beati Donati humatum requiescit, preceptali institutione vel aliquo alio modo concesserunt, scilicet ut nullus dux, marchio, comes, vicecomes nullaque magna vel parva persona prefatos fratres suosque colonos amodo et deinceps in perpetuum audeat molestare, foderum vel aliquas reditiones fisco nostro pertinentes exigere, sed securi et absque ulla molestatione omnipotenti deo deique genitrici ac semper virgini Marie ac protomartiri Stephano beatoque Donato martiri atque pontifici servire et pro statu nostri imperii valeant exorare. Insuper addidimus, ut, quicumque fervore dei tactus prefatis fratribus terras, casas, vicos, castella conferre voluerit, libera sit ei facultas donandi, vendendi vel comutandi absque ullius magne parveque persone interdictu. Hęc omnia, quę predictis canonicis a nobis vel ab antecessoribus nostris seu ab aliquibus dei fidelibus data sunt et in futuro tempore danda erunt, nos quidem nostra regali potestate confirmamus et corroboramus atque eosdem in perpetuum habere sancimus, eo videlicet ordine, ut nec rector eiusdem sedis vendere vel alienare vel aliquis recipere nec cuiuslibet potestatis persona de predictis rebus vel de eorum pertinentiis sive de his, que divina pietas inibi augeri voluerit, illis aliquas inferre presumat contrarietatem vel deminorationem ulla[s ingerere] adtemptet. Recipimus quoque eos cum omnibus eorum rebus mobilibus et immobilibus illis iuste et legaliter pertinentibus sub nostre tuitionis mundiburdio, quatenus secure vivere deoque servire et pro nobis statuque regni et imperii nostri remedioque anime nostre orare illos iugiter delectet. Si quis igitur huius nostre confirmationis precepti violator extiterit, sciat se compositurum auri cocti libras mille, medietatem camere nostre et medietatem canonicis sancte Aretine æcclesie pro tempore ordinatis. Quod ut verius credatur diligentiusque ab omnibus observetur, manu propria roborantes sigilli nostri impressione corroborari decrevimus.

Signum domni Heinrici quinti Romanorum regis invictissimi. (M.6.).

Burchardus episcopus et cancellarius vice Alberti archicancellarii, Maguntine sedis electi, recognov[it]. (SI.D.).

Data XIIII. kl. februa., indictione III, anno dominicę incarnationis millesimo CXI, regnante Heinrico quinto rege Romanorum anno V, ordinationis eius XI; actum est Aretii; in Christo feliciter amen.