In nomine sancte et individue trinitatis. Henricus divina favente clementia V. rex. Christianorum regum, quorum clementia dei domus ditata est et studio pietatis ipsorum observata, sanctam consuetudinem cupientes observare credimus, quod nos in presenti regni nostri stabilitatem consequi et in futuro a domino eternam retributionem indubitanter accipere. Quapropter notum fieri volumus omnibus Christi nostrique fidelibus tam futuris quam presentibus, qualiter nos causa dei et anime nostre nostrorumque salute parentum, digno interventu Adalberti nostri dilecti cancellarii, Brunonis Treuirensis archiepiscopi aliorumque nostrorum multorum fidelium mercatum Dompetri, quod domina Govnegundis pro anime sue salute dedit cenobio Senoniensi, eidem cenobio per hanc preceptalem paginam concessimus et concedendo firmavimus. Precipimus itaque, ut nullus mortalium hanc nostre paginam pietatis presumat violare sub pena nostri banni centum librarum auri, medietatem nostre camere et medietatem predicto cenobio. Quod ut inviolabiliter ab omnibus observetur, impressione nostri sigilli iussimus insigniri.

Signum domini Henrici quinti regis invictissimi.

Albertus cancellarius recognovit.

Data XVI. kal. marc., indictione decima quarta, anno dominice incarnationis millesimo centesimo quinto, regnante Henrico Vo rege anno sexto; actum est Spire; feliciter in Christo amen.