In nomine sanctę et individuę trinitatis. Heinricus divina favente clementia rex. Regalem nostri nominis excellentiam hoc scimus exigere, immo ad statum regni et ad salutem animę nostrę multum proficere, quosque divini servitii amatores, ut sine querela in dei persistant laude, liberalitatis nostrę sustentaculo confortare, maxime autem eos, quorum laboris devotio divino pre cęteris invigilat obsequio. Proinde noverit omnium Christi nostrique fidelium universitas, qualiter nos divinę remunerationis spe incitati, interventu etiam H. venerabilis episcopi necnon assiduis canonicorum querelis commoniti, Augustensi ęcclesię in honorem sanctissimę dei genitricis constructę quandam curtem Strubingam dictam, in pago Tǒnegǒwe, in comitatu Adalberti comitis sitam, quam pię recordationis Bruno episcopus, frater videlicet divę memorię secundi Heinrici imperatoris, ad supplenda et augenda canonicorum cottidiana stipendia ex propria hereditate eidem ęcclesię contulit, cum omnibus appendiciis, villis scilicet, areis, agris, vineis, pratis, pascuis, aquis aquarumve decursibus, vado, theloneo, mercato, molendinis, piscationibus, exitibus et reditibus, quesitis et inquirendis, silvis, venationibus, familiis utriusque sexus, cum beneficiis et prediis ministerialium, si qua legitimo vacarent herede, cęterisque, quę quolibet modo dici aut scribi possunt, utilitatibus ad eandem curtem iure et legaliter pertinentibus per hanc regalem paginam canonicis in proprium largimur et omnia antiqua iura illis restauramus, concedimus ac perpetualiter confirmamus, ea videlicet ratione, ut nec episcopus eiusdem loci nec advocatus nullaque ęcclesiastica vel iudiciaria potestas aliquam habeat potestatem prenominatam curtem ęcclesię prefatę auferre vel usibus fratrum ibidem sub canonica institutione deo servientium abalienare, sed predicti canonici Augustenses eorumque successores liberam exinde habeant potestatem, quicquid eis placuerit, faciendi [ad utilitatem] tantummodo fratrum ibidem deo sanctęque Marię famulantium, omnium hominum contradictione remota. Et ut hęc nostrę largitionis, concessionis et confirmationis auctoritas stabilis et inconvulsa omni permaneat ęvo, hoc preceptum inde [conscriptum propria manu corroborantes sigilli nostri impressione iussimus insigniri].

Signum domni Heinrici quinti invictissimi regis.

Data kal., indictione IIIa, anno dominicę incarnationis millesimo CX, anno vero [domni] Heinrici quinti regnantis V; actum Ratispone; feliciter amen.