(C.) In nomine sancte et individue trinitatis. Heinricus divina favente clementia quintus Romanorum rex. Omnibus Christi fidelibus nostrique tam futuri temporis quam presentis notum fieri volumus, qualiter nos causa dei, rogatu et consilio Adalgoti Madaburgensis archiepiscopi et episcoporum: Vthonis Hildenesheimensis, Reinhardi Halberstetensis, Burchardi Monastergensis, Adalberti nostri dilecti cancellarii, Liutheri ducis, comitum: Heremanni, Wicberti, Dedonis, Eruwini, aliorumque multorum nostrorum fidelium, Reinnoldi, Widoldi, Cvonradi, Ruotberti, Brunonis de Tidendorp, Acconis, Burchardi, Switheri, concambium in nostra presentia factum inter Goslariensem ęcclęsiam et Warneherium, Pauline filium, postulantibus advocatis utriusque partis, Lodowico videlicet comite, Liutdolfo, laudavimus atque firmavimus. Warneherius enim tradidit ęcclesię Goslariensi Batikansteten predium, quod ipse libere possidebat, cum omnibus pertinentiis eius tam ibi quam alibi iacentibus, aquis aquarumque decursibus, molis, molendinis, piscationibus, areis, terris, cultis et incultis, pratis, pascuis, silvis, exitibus et reditibus et omni utilitate, que inde poterit omni tempore provenire. Ecclesia autem econtra communi consilio et consensu Elberti prepositi, canonicorum et familię tradidit modo dicto Werenherio in liberam possessionem predium Bunisdorp cum omnibus eius pertinentiis et commoditatibus eius, hoc est areis, agris, pratis, pascuis, campis, silvis, molendinis, piscationibus, quesitis et inquirendis et omni utilitate, que inde poterit omni tempore extorqueri. Sic igitur ab utraque parte rationabiliter atque concorditer nobis laudantibus et confirmantibus celebratum est istud concambium. Hoc autem notum esse volumus christianis omnibus, quod predictus Warneherius divinitus inspiratus prenominatum predium Bunisdorp pro salute animę suę contulit celle in honore sanctę Marię sanctorumque omnium edificatę in loco et in pago Lancwizi in comitatu comitis Sizen.

Ut autem tam rationabilis concambii constitucio nostra pietate solidata omni evo credatur ab omnibus et inviolabilis permaneat, hanc inde cartam conscribi fecimus et manu propria corroboratam inpressione nostri sigilli iussimus insigniri.

Signum domni Heirici (!) quinti Romanorum regis invictissimi. (M.6.)

Albertus cancellarius vice Maguntini archiepiscopi recognovit. (SI.D.)

Data IIII. non. iulii, indictione I, anno dominice incarnacionis millesimo CVIIII, regnante Heinrico quinto rege Romanorum anno IIII, ordinationis eius VIIII; actum est Goslarie; in Christo feliciter amen.