(C.) In nomine sanctaę et individuae trinitatis. Heinricus divina favente clementia quntus (!) Romanorum rex. Notum fieri volumus omnibus Christi nostrique fidelibus tam futuri temporis quam presentis, qualiter nos causa dei, ob remedium animę nostrę nostrorumque parentum, rogatu et consilio archiepiscoporum: Frederici Coloniensis, Brvnonis Treuerensis, Adalgoz Madeburgensis, episcoporum: Albvini Mersburgensis, Ottonis Bauembergensis, Bvrchardi Monasteriensis, Lvtherii ducis, comitum: Otthonis, Rodvlfi, Wiberti, aliorumque multorum nostrorum fidelium et precipue digna petitione Hervici Missinensis episcopi, nostri dilecti fidelis, novem mansos, sex in burchwardo et in villa, quę dicitur Tribene, tres autem in villa, quę nominatur Chrowati, iuxta flumen Sala, Missinensi ęcclesię in proprietatem dedimus cum omnibus eorum pertinentiis ex integro, sicut ad nostrum ius pertinebant, videlicet familiis utriusque sexus, terris cultis et incultis, areis, pratis, pascuis, silvis, aquis, molendinis, piscationibus, quesitis et adquirendis, viis et inviis, exitibus atque reditibus et omni utilitate, quę inde poterit omni tempore provenire. Ut autem hoc nostrę donum pietatis ab omnibus credatur et inviolabile permaneat, hanc cartam inde conscriptam et manu propria corroboratam, ut inferius apparet, impressione nostri sigilli insigniri iussimus.

Signum domni Heinrici quinti Romanorum regis invictissimi. (M.6.)

Albertus cancellarius vice Rotardi Maguntini archiepiscopi recognovit. (SI.1.)

Data III. kl. iunii, indictione I, anno ab incarnatione domini millesimo CVIII, regnante Heinrico quinto rege Romanorum anno III, ordinationis eius VIIII; actum est Mersborc; in Christi nomine feliciter amen.