In nomine sanctæ et individuæ trinitatis. Notum sit omnibus veritatem colentibus tam posteris quam presentibus, quod ego Iustina mulier peccatrix predium, quod habui Lintw[i]lere in Eifla, et partem de ecclesia in Hoinbuilo ecclesię sanctorum martyrum Chrysanti et Darię, quę est sita in villa Nouo Monasterio in Eifla, ad usum inibi deo famulantium pro peccatorum meorum remissione et pro remedio animę viri mei, qui ibi sepultus erat, et aliorum m[e]orum antecessorum liberum et solutum nullo contradicente tradidi. Huic traditioni interfuerunt liberi, scilicet filius meus Adelbero, qui manu propria mecum hanc traditionem fecit, Růtholfus advocatus ipsius loci et filii eius Hubertus, Gerlachus et alii plures tam clerici quam laici. Et ne hęc traditio postea aliquorum calumnia quassaretur, scripto annotata et domino Heinrico quinto Romanorum imperatori augusto presentata, eo precipiente presenti sigillo confirmata est.

Facta [e]st autem hęc confirmatio anno dominicę incarnationis millesimo centesimo XIIII, indict[ione] VII.