(C.) In nomine sanctae et individuae trinitatis. Heinricvs divina favente clementia V. Romanorum rex. Quia regni nostri administrationem divina gubernatione dispensari cupimus, dignum est, ut eius munificentiam, qui de humili nos exaltavit, sumptis ab eius largitate muneribus honoremus. Sic enim humilitatem nostram scuto suę protectionis speramus obumbrari, si et ex eo regnare et regiminis nostri successum eius gratię satagamus asscribere. Unde tam presentibus quam futuris notum esse volumus, quia monasterium sancti Georgii in Goslaria situm, ab ab (!) avo meo fundatum quidem, sed inperfectum, cum pro animę nostrę remedio tum pro devoto fidelis nostri Vdonis episcopi servicio sancte Marię in Hildenesheim cum omnibus ad id pertinentibus, vineis scilicet, villis, mancipiis, pratis, pascuis, aquis aquarumve decursibus, molendinis, acquisitis ac quirendis, in proprium tradidimus. <Preterea ex regali nostra munificentia comitatum situm in pago, qui dicitur Herthega, terram quoque cum silvula circumiacentem, quę Al dicitur, quicquid inter duas publicas vias, unam, quę Beningerothe, alteram, quę Immerothe ducit, ad utilitatem inibi deo servientium addimus.> Quam traditionem, ne ab ullo futurorum regum irritetur, et sigilli inpressione et regalis banni auctoritate communivimus.

Signum domni Heinrici quinti Romanorum regis invictissimi. (M.4.) (SI.D.)

Albertvs cancellarius vice Rothardi Maguntini archiepiscopi et archicancellarii recognovit.

Data mense ianuarii, indictione I, anno dominice incarnationis millesimo CVIII, regnante Heinrico V. rege Romanorum anno III, ordinationis eius VIIII; actum est Aquisgrani; in Christi nomine feliciter amen.