In nomine sanctæ et individuæ trinitatis. Henricus divina favente clementia quartus Romanorum imperator augustus. Dignum esse iudicamus et ad vitam presentem transigendam et ad futuram feliciter obtinendam nobis profuturum non dubitamus, secundum fidelium nostrorum iustas petitiones ecclesiasticas facultates et a cuiuslibet potestatis iniusta pervasione liberare et liberatas augmentare, augmentatas quoque regalis edicti munimine tuendas confirmare. Quapropter omnibus divini nostrique nominis amatoribus tam futuris quam presentibus perspicuum esse volumus, quia Tiebaldus de Foron vir ingenuus ad extrema veniens mandaverit coniugi suæ fidelissimæ scilicet Gudæ et Arnulpho nepoti suo, ut apud sanctum Iacobum in insula Leodii corpus suum sepelirent, duo prædia, Colombier videlicet et Bilisten, ecclesiæ beati apostoli pro redemptione animæ suæ traderent. Post cuius obitum iamdicta uxor eius atque nepos mandatis ipsius fideliter obtemperantes in die, qua sepultus est, duo illa prædia ecclesiæ sancti Iacobi per manum advocati, Arnulphi scilicet comitis de Los, iure perpetuo tradiderunt cum omnibus appenditiis ad ipsa prædia respicientibus, videlicet familia, agris, pratis, pascuis, silvis, aquis, ea certe lege atque iure, quo ipsa vivens illa obtinuit, et ita scilicet, ut utrumque allodium a cuiuslibet extraneæ potestatis placito vel districtione liberum penitus sit et immune, advocationem autem utriusque prædii nepos eius Arnulphus consensu abbatis vel fratrum retinuit sibi, non tamen ita, ut placitum vel aliquod servicium ibi aliquando habeat, non ingrediatur aut exeat, non certe se omnino intromittat, sed ea tantum ratione, ut pro anima avunculi sui Tiebaldi hoc bonum contra omnem invasorem, si opus sit, iure advocati defendat. Facta est autem hæc traditio presente domino Otberto Leod(iensi) episcopo multisque regni nostri summis primatibus, quorum nomina ad ipsam roborandam infra sunt subscripta: comes Cuno, Wilelmus advocatus Leodii, Renerus advocatus sancti Lamberti, Gillebertus de Grunes, Wolbertus de Woldeymont, Godefridus de Sineis, Bovo de Wahart, Engo filius eius, Boso de Braz, Walterus de Bullione, Balduinus filius Ebulonis de Forselis, Gilebertus de Haret et alii plures. – Hac itaque traditione legitime peracta venerabilis Guda, pie memor et sollicita de salute defuncti coniugis, tertium quoque prædium, quod Struona dicitur, supra Mosellam situm, pro anima eius per manum eiusdem comitis Arnulphi tradidit sancto Iacobo cum omnibus appenditiis suis, familia scilicet, agris, vineis, pratis, pascuis, aquis, silvis; cuius advocationem nec sibi retinuit nec prædicto Arnulpho vel cuique constituit, sed liberum ab omni iure alieno sive advocato tradidit, ut ecclesia cuicumque vellet illud committeret, qui tueri et defendere illis in partibus posset. Huius secundæ traditionis testes sunt: Willelmus advocatus Leodii, Wilelmus de Herencenes, Wilelmus de Daveles, Arnulfus de Lentres, Cuno de Herdines, Arnulphus de Roden et duo filii eius Arnulphus et Gilebertus, Franco de Castren et plures alii. Ego igitur Henricus gratia dei Romanorum imperator augustus, cum pascha Leodii celebrarem, honorifice postulatus a venerabili ipsius civitatis episcopo Adelberone et Olberto eiusdem ecclesiæ sancti Iacobi abbate atque fideli meo Arnulpho comite de Los, eiusdem advocato, prædictas traditiones, ut scriptæ sunt, inspexi et approbavi, signo sigilloque meo contra omnem imperpetuum controversiam communivi, astantibus, videntibus et ipsum approbantibus multis summisque regni mei primoribus, quorum nomina ad ipsa corroboranda infra subscripta sunt: Adelbero episcopus Leodiensis, Godeboldus episcopus Ultraiectensis, Henricus episcopus Virdunensis; Andreas præpositus sancti Lamberti, Philippus præpositus Traiectensis; Alexander et Steppo, archidiaconi; Reinzo, Arnulphus, Reinbaldus, Wido, canonici; Tiebaldus marchio, Berengerus comes de Sozbach, Arnulphus comes de Los, Gerardus comes de Wassenberch, Wilelmus comes, Lambertus comes, Wigerus advocatus sancti Lamberti, Arnulphus de Rode, Werricus de Calvo Monte, Otto filius Gileberti de Duraco, Arnulphus de Erscloch, Lambertus frater Wenrici; de familia imperatoris: Heinricus Houvech, Folmarus, Richardus, Ludovicus et alii multi.

Anno dominicæ incarnationis MCXXV, indictione tertia, anno autem imperii dompni Henrici Romanorum imperatoris augusti XV; actum Leodii; feliciter in nomine domini; pridie kalendas aprilis.