In nomine sancte et individue trinitatis. Heinricus dei gratia Romanorum imperator augustus omnibus Christi fidelibus gratiam. Notum sit omnibus christianę fidei cultoribus tam futuris quam presentibus, qualiter venerabilis vir et fidelis noster Erlolfus sanctę Fuldensis ęcclesię abbas adiit serenitatis nostrę excellentiam obsecrans, ut ex more antecessorum nostrorum, preclarissimorum scilicet principum Pippini, Karoli, Ludewici, Lotharii, Cunradi, Ottonis, Arnolfi, Heinrici, Fuldense monasterium, cui ipse donante deo presidet, cum hominibus et rebus, quę ab ipsis preclarissimis principibus aliisque religiosis illuc collata sunt ad laudem et gloriam dei sanctique Bonifacii martyris, qui illic corporaliter requiescit, per auctoritatem nostri imperii tueremur et in nostrum mundiburdium susciperemus res et facultates ac familias illuc collatas in munitatibus, in reditibus, in hubis, in villis, in territoriis, in decimis, in molendinis, in forestis, in theloneis, in vineis, in novalibus et in omni districtu et omni utilitate. Cuius peticionem complentes ob divinum amorem predictum Fuldense monasterium cum supranominatis bonis in nostram tutelam et defensionem suscipimus et omni protectionis munimune solidamus, ea ratione ut nullus iudex vel quilibet ex iudiciaria potestate in possessiones, villas aut loca, quas moderno tempore infra regnum nostrum idem possidet monasterium, vel quę deinceps divina pietas adauxerit ad causas iudiciario more audiendas aut freda exigenda vel mansiones faciendas vel servos vel colonos distringendos nec ullas redibitiones vel illicitas occasiones requirendas nostris futurisque temporibus ingredi audeat vel ea, quę supra memorata sunt, exigere presumat, sed abbati eiusdem monasterii liceat totum sibi subiectum populum cum omnibus eiusdem ęcclesię rebus sub nostra defensione possidere et decimas sibi apostolica auctoritate collatas accipere in usus ęcclesię suę nec laicis in beneficium contra canonum decreta prestare. Et quidquid de supradictis rebus ius fisci nostri exigere poterat, pro ęterna remuneratione prefato monasterio et fratribus deo ibidem famulantibus conferimus firmissime precipientes, ut in bonis et locis, et familiis eorum nullus eos contristare presumat. Habeat ergo abbas prefati monasterii potestatem thelonea accipere et monetas ponere, vectigalia et reditus prediorum simul cum decimatione tollere et in sue ditionis utilitatem redigere propter ędificia ęcclesię facienda pauperesque et hospites recreandos. Quodsi abbas monasterii obierit, habeant fratres liberam electionis potestatem. Quicumque autem hoc preceptum violaverit, apostolica sententia excommunicandus erit.
Unecht.
Heinrich bestätigt auf Bitten des Abtes Erlolf dem Kloster Fulda für seine Besitzungen den königlichen Schutz, die Immunität und den in die Zuständigkeit des Abtes fallenden Zehntbezug, überträgt dem Kloster mögliche fiskalische Ansprüche auf die Besitzungen, verleiht dem Abt das Recht auf Zoll, Münze und Steuer für Zwecke des Kirchenbaus und der Armen- und Gastpflege und gewährt dem Konvent das Recht der freien Abtwahl.
(1113/4 – 1122 Oktober).