Heinricus dei gratia Romanorum rex Gisle abbatisse Romarici Montis salutem cum gratia sua. Quoniam filius et defensor ego sum Romane ecclesie, eidem universali matri mee sub defensione mea posite me obedire per omnia conveniens est; offendere autem matrem meam in aliquo nimium indecens est, quia a preceptis eius recedere periculosum animabus est. Quidquid ergo statuit sancta et venerabilis sedes Romana per manum summi pontificis, ne hoc aliquando cassetur, sed ut ratum et stabile fiat, quoad potero, usque ad mortem laborare non cessabo. Quapropter mandamus et insuper precipimus tibi, ut, quod predicta sedes sanxit de fratribus Calmosiacensis loci, ne presumas aliquomodo frustrare et ex aliqua parte sacrosanctum preceptum exintegrare et ne matrem tuam, cuius filiam te profiteris, non ut matrem sed ut novercam, non ut filia sed ut privigna audeas exacerbare. Quodsi manum ad violanda precepta matris mee extenderis, et odium celestis regis incurres et iram terreni regis, qui gladium pro eius defensione suscepi, non evades. Quia, ut supra dixi, certare pro defensione Romane sedis usque ad mortem non desinam.