(C.) In nomine sancte et individue trinitatis. Heinricus divina favente clementia Romanorum imperator augustus. Quandocunque nostre imperialis corroborationis pie exposcitur suffragium, celeri est æffectu adtribuendum et, si in his exposcitur, quę durare perpetue videntur, literis est etiam adnotandum, ne prolixitas temporum posteris hoc reddat dubium vel incertum. Noverit igitur omnium tam futurorum quam presentium industria, qualiter nos preces domini Ǒdalrici Tridentinensis venerabilis episcopi et dilecti fratris nostri cuiusdam nobilis Uolcholdi clementer admisimus et cenobium sanctimonialium in loco qui dicitur Sůneburc, quod idem Uolcholdus in honore sancte dei genitricis perpetue virginis Marie construxit, cum domina abbatissa Wigburga ceterisque suis sequacibus et sanctimonialibus inibi deo famulantibus, cum omnibus quę prefatus Uolcholdus illi loco contulit possessionibus, edificiis, campis, pratis, pascuis, silvis, venationibus, aquarumve decursibus, piscationibus, cum familia utriusque sexus, terris cultis et incultis, iuste acquisitis vel acquirendis, in tuitionem nostram suscepimus. Decernimus quoque, ut nec prenominatus pontifex Ǒ. nec aliquis suorum successorum Tridentinensis episcopatus, ad cuius mundiburdium prefatus Volcholdvs bona intentione et in vere protectionis tutelam ipsum locum tradidit, nullam potestatem habeant ex rebus eidem ecclesie traditis aliquid in suos convertere usus. Sin autem iniusta detenti cupiditate in aliquibus prefatam ecclesiam temeraverint, ipsius loci abbatissa potestatem habeat mundiburdium predictum episcopatui aufferre. Sane ut sanctimonialibus in eodem cenobio degentibus omnimodis profutura esse debeant, quecumque largitione principum, oblatione fidelium collata fuerint vel modo contradita sunt, nominatim que prefatus pontifex Ůdalricvs in sustentamen illi ecclesie ad altare sancte Marie cum manu advocati sui Ronzonis tradidit: singulis annis deccem carradas vini, tres sagmas olei et in Summolacus dicto loco piscium decipulam et in loco Enna nuncupato piscatores tres, post obitum domini Uolcholdi tale bonum, quale idem ipse pro suo predio Rischone de rebus eiusdem episcopatus pro pacto et quadam federatione habuit, situm in locis Enna et Filanders, omne eis nostræ auctoritatis robur accommodamus. Decernimus etiam, ut nulla imperii nostri magna vel parva persona prefatam ecclesiam in possessionibus, quas nunc habet vel in posterum habitura est, audeat disvestire, sed sub nostre pacis ac tuitionis quiete omni tempore rata et inconvulsa [ei] permaneant. Quod ut ab omnibus veraciter credatur et diligentius observetur, presentem inde paginam conscribi et sigilli nostri inpressione insigniri iussimus, sub testimonio principum Herimanno Augustensis episcopi, Hartwico Raitisponensis episcopi, Welfoni duci Baubariorum, Diepaldo marchione de Uoheburc.

Dat. Auguste VI. kalendarum iulii, anno ab incarnatione domini MXVIII.

Sigillum domini Heinrici Romanorum imperatoris augusti. (SI.)