In nomine summe et individue trinitatis. Heinricus divina sumministrante clemencia Romanorum rex augustus. Quoniam si in laude celorum regis et cerimoniis omnibusque, que ad cultum divinum pertinent, pie animum intendimus, id nobis summopere ad provehenda terreni regni gubernacula proficere credimus. Notum esse volumus omnibus tam presentis quam futuri temporis fidelibus, qualiter nos cuidam cenobio Reinhersbrunno dicto, a Ludowico comite circa Loybam silvam edificato proque anime sue ac parentum suorum salute beatis apostolis Petro et Paulo Rome oblato ac in Romani pontificis defensionem iure perpetuo delegato, pro honore dei genitricis et virginis Marie sanctique Iohannis apostoli et ewangeliste, quorum nomini dedicatum est, silvam nomine Windefelt et Elisis, quam Gebehardus miles de Nordeka iure hereditario propriam possidens, sed pro sue remedio anime omniumque debitorum suorum deo devote iam dudum obtulerat, stabilitam hiis regalibus edictis libere perfruendam fecimus, que hiis lachis et terminis includitur: a loco, ubi consurgit orientalis gabala fluvioli Luteron, per descensum eius usque quo influit Sigilbach, et sic sursum ad ortum illius per latus Hohenberg usque Alberadisheimbeche, deinde super Birindal ad Holenbeche, inde iuxta Steynenhůrst ad Lumboumeclinga, inde ad Steinistal sursumque usque Wydinsul, hinc sursum super fluviolum Durrinhesilon, hinc in Gruenenhesilon, inde sursum super Aldassuant in Duringbach deorsum, hinc in Herigozeshelminaha sursumque ad Milinbuoch, cum omnibus suis pertinenciis, hoc est areis, edificiis, terris cultis et incultis, viis et inviis, exitibus et reditibus, venacionibus, piscacionibus cunctisque utilitatibus, que aliquo modo dici vel nominari possunt, ea videlicet condicione, quatenus ibidem in futurum deo auxiliante monastice professionis institucio proficiat. Quo in loco disponente Ernesto venerabili abbate oratorio constructo eiusdemque peticione in honore sancti Blasii martiris dedicato supradictus Gebehardus ad confirmandum sue devocionis effectum ipso dedicacionis die in dotem illius ecclesie alium in alio loco non longe inde distinctum sue hereditatis bifant contulit, qui cum suis appendiciis hiis lachis dinoscitur: a rivulo Luetinbach per cacumen montis Lutinberg usque ad vallem Hazechingruobe, inde ad Gruenenhasala sursumque per ascensum eius usque ad ortum, inde per directum Hessisneitan usque ad Eychyneberg, inde ad Snebach, inde ad Ellinberchdisrot, sicque per dorsum montis Ebenberg in Steizbach iuxta villulam Heinrichs. Cuius donacioni nos quoque concessionis nostre libertatem superaddentes regali auctoritate decernentes sanccimus, ut nulli omnino liceat hominum prenotatum temere perturbare locum aut ei collatas possessiones aufferre, sed quidquid hodie deo illic servientes possident sive in crastinum oblacione fidelium adipisci poterunt, quiete et absque ullius fatigacione iugiter perfruantur. Et ut hec nostre donacionis auctoritas rata et inconvulsa omni tempore permaneat veriusque ab universis semper credatur, hanc testimonii cartam inde conscriptam manuque propria corroboratam sigilli nostri impressione iussimus insigniri.

Signum domini Heinrici IIIIti imperatoris augusti invictissimi.

Adalbertus cancellarius vice Mogunt. ecclesie, que nunc archicancellariatum tenet, recognovi.

Data VIIo kalend. septembr., anno dominice incarnacionis MoCoXIo, indictione IIIIta, anno domini Heinrici IIIIti imperatoris imperii primo, regni autem VIIo; actum Wormacie; feliciter.