(C.) In nominę sanctę et individve trinitatis. Heinricus dei gratia qvintus Romanorvm rex. Notum sit tam futuris quam presentibus omnibus, quod pro peticione domini Ottonis comitis de Sutfenne et filii eius Heinrici, qui imperio sepius magnificum exhibuerunt obsequium, ecclesie eorum in Sutfenne dedi beneficium in perpetuum iure hereditario permansurum, ut, quicumque liber vel libera se vel possessiones mobiles vel immobiles illi ecclesie dare voluerint, licenter regia freti auctoritate hoc faciant, nec sit alicuius momenti contradictio iudicis, in cuius terra manent, censu tamen regio ei, cuius feodum est, non subtracto, si quidem censum prius solvit illa possessio. Item super predia culta et inculta predicte ecclesie, super saltus, nemora, flumina, ripas et super omnia, que nunc in possessione habet vel postmodum habitura erit, prepositum ipsius ecclesie per omnem successionem, quicumque fuerit, iudicem ordinarium constituimus et eius scultetum. Item de omni negotio, quod ortum fuerit adversus ecclesie hominem, sive par eius sive homo alterius potestatis agat in eum vel accuset eum, quod testibus vel iureiurando terminari potest, iudex erit prepositus. De furto autem vel de rapina vel incendio vel sanguinis effusione vel quocumque maleficio scultetus prepositi iudex erit. Item ipso (!) domino comiti et eius successoribus confirmamus omnimodam iusticiam super homines suos, qui dicuntur malmanne, et super eorum predia. Omnimodam quoque iusticiam in Menardinghamme et bannum ferarum ex utraque parte Isle ei confirmamus, quod totum predecessores eius et ipse ex proprietate sua, non ex dono regali, habet, nec nos invidemus. Hec autem facta sunt consensu dominorum, qui iurisdictiones habent, et consilio et auctoritate et testimonio principum regni. Ego quoque propria manu annotavi, sigillo insignivi. Signum Frederici Coloniensis archiepiscopi. Signum Otberti Leodiensis episcopi. Signum Burchardi Traiectensis episcopi. Signum Burchardi Monasteriensis episcopi. Testes: Gerardus comes, Eruinus comes, Cono comes, Heinricus comes de Cassele, Theodericus de Los, Stephanus et Herimannus de Oies, Berengarius comes de Sulzebac.

Signum domini Heinrici quinti regis Romanorum invictissimi. (M.) (SI.D.)

Ego Albertus cancellarius vice Rothardi archicancellarii recognovi.

Anno ab incarnatione domini MoCVIII, indictione I, anno domini Heinrici quinti regis Romanorum IIo; data Aquisgrani V. kl. ianuarii; in Christo.