In nomine sancte et individue trinitatis. Ego Heinricus divina favente gratia quintus Romanorum [rex] notum facio omnibus presentibus et futuris dei et nostris fidelibus, quia Conradus imperator atavus meus precatu Stephani abbatis sancti Laurentii advocatiam predii, quod habebat sanctus Laurentius in Wasegga, dedit Alberto Nammucensi comiti, constituens ei pro ipsa advocatia annuatim in festivitate sancti Remigii de singulis mansis fiscalibus modium avene et IIII denarios et in tribus generalibus [pl]acitis tertium tantum denarium, sed et ipsum denarium non sua, sed abbatis et ministri eius dispositione recipere. De omnibus vero aliis, que foris [v]el intus abbas vel ministri eius per se corrigere possent, [n]ih[i]l exigeret nec de ullo alio negotio ei in aliquo penitus molestus esset, [non] ib[i per]noctaret aut obsonia aliqua vel ab abbate vel a rusticis exigeret, null[am ibi] precariam faceret, nihil omnino preter tertium denarium de placito et in quolibe[t trium] placitorum generalium IIIIor tantum solidos pro obsoniis suis recepturus. Hoc constitutum [multis] annis ab ipso Alberto comite et a filio eius eque Alberto vocato inviolabilit[er cu]stoditum cum Godefridus filius eius comes Nammucensis trangressus esset et mu[ltis in]iusticiis et infractionibus tam ipse quam, qui sub eo sunt, advocati Was[egganos premerent], Berengerus abbas sancti Laurentii nos adiit et proclamationem faciens a[dversus insolen]tiam eius et subadvocatorum suorum nostre potestatis auxilium postulavit. Ide[o] evocatum ipsum comitem Godefridum de infractione advocatie, quam ex nobis tenebat, arguimus et ex decreto fidelium nostrorum precipimus et regali edicto statuimus ei, ne ulterius quicquam iniusticie aut infractionis aut violentie in Wasegga presumeret inferre, nullam pernoctationem in ea faceret, nullum obsonium preter constitutum, nullam precariam nec ipse nec subadvocati eius ulterius ibi exigerent, nihil omnino preter supradictas constitutiones ibi usurparent. Et quia ratione victus de his omnimodam correctionem coram optimatibus nostris et suis hominibus promisit, ut huius iusticie veritas rata et inconvulsa permaneat, charta hec precepto nostro conscripta et sigilli nostri impressione firmata erit sancto Laurentio in testimonium defensionis contra violentiam improbitatis. Preterea de terris adiacentibus Publico Monti, que sunt sancti Laurentii, et de parva insula, quoniam et de his coram nobis querela acta est, sicut et de ceteris possessionibus clericorum, que sunt infra urbem vel in suburbiis, precipimus et presentis sigilli ratum munimine et constans esse volumus, ut abacto omni violente novitatis machinamento secundum leges veteres, quas habuerunt hactenus, ex quo fundata est ipsa ecclesia sancti Laurentii, per annos ferme LXXVIII, secundum ipsas agant sibi in omni placito ve[l n]egotio, scilicet ut omnia a districtu episcopi sint libera preter falsam mensuram et latr[on]em et legem campalem sturmamque et burinam. Et quicumque in huiusmodi deprehens[us f]uerit culpabilis, solus eat ad placitum Aureti, ceteri omnes ab eodem placito sint l[iberi]. Null[am] ibi precariam faciat neque heribannum nisi per abbatem accipiat nec de u[llo] penit[us pla]cito quisquam eis molestus sit preter ea, que excepta sunt. Et ut omnis legalis f[irmita]s impleretur, testes ingenuos adhibuimus: Erluinum Wizeburgensem episcopum, Brunonem [Spiren]sem episcopum et fratrem eius Albertum cancellarium, comitem Wibertum, comitem H[er]imannum, [comitem] Geruinum, comitem Arnulphum de Los, Wilhelmum civitatis advocatum, W[ilhe]lmum d[e Nam]muco, Lambertum de Mastreit, Henricum de Nameche.