(C.) In nomine sancte et individue trinitatis. Heinricus divina favente clementia qvartus Romanorum imperator augustus. Iustum esse iudicamus et acceptum coram deo et hominibus esse credimus ecclesiasticas facultates oblatione fidelium divinis usibus traditas iure et auctoritate imperiali confirmare et tueri atque regalis sigilli astipulatione contra omnem in perpetuum controversiam communire. Quapropter noverint omnes Christi fideles tam qui futuri sunt tam qui presentes viderunt, quod Guda mulier nobilis et vidua honorabilis, secundum voluntatem dei privata fructu ventris sui, elegit sibi successorem et rerum suarum heredem beatum Iacobvm fratrem domini, cuius ecclesia sita est in insula Leodii. Igitur tradidit eidem ecclesię duo allodia, unum quod est in Eira, alterum quod dicitur Witham, utraque cum appendiciis suis, eadem libertate, eodem iure, quo pater suus possedit in ultimo suo fine, per servos et per ancillas, per beneficia, per aquas, per prata, per silvas. Confirmavit etiam in eadem traditione illos XLa solidos de censu Eirę, quos redemit de manu Wederici, hoc ordine debere distribui: septem solidos in anniversario patris sui, VII in anniversario matris suę, V in anniversario domini sui Arnulfi, XI in suo, ex quibus duo solidi distribuantur ad elemosinam pauperum, VIIII reliqui ad refectionem fratrum; itemque decem solidos ad unam candelam singulis noctibus comparandam haberi decrevit. Constituit quoque in eadem traditione memoriam sancti Seruatii in eadem ecclesia perpetuo celebrari debere fratribusque in ipsa sollemnitate ex allodio de Witham VII solidos provenire, reliquum, quicquid superest, ad vinum fratrum pertinere. Advocatum autem utriusque allodii Arnulfum fratrem suum constituit, ea conditione firmiter interposita, ut ipsa vivente nullomodo de eadem advocatione absque eius consensu se intromittat, nullum inde servitium recipiat; ea vero defuncta si eum abbas sibi necessarium iudicaverit, accedat et absque rogatu abbatis se numquam debere accedere pro certo sciat, tamen, sive veniat sive non veniat, de tribus generalibus placitis in Eira habebit III solidos, de unoquoque eorum XII denarios, sed apud Witham nonnisi sextarium vini trium denariorum; certus autem esse debet, quia nullum umquam sibi secundum supponet advocatum, nec post eum aliquis heres eius in ęternum. Facta est hęc traditio per manum eiusdem Gudę et per manum Arnulfi fratris sui, suscipiente eam Arnulfo comite de Los, advocato sancti Iacobi. Testes traditionis de Eira fuerunt, quorum nomina subscripta sunt: Teodericus frater comitis Arnulfi, Cuno de Hers, Gerordus de Hers, Gerardus de Horpala; fideiussores vero de Witham: Iulianus de Wahart, Arnulfus de Streis, Cuno de Uerinis, testes vero: Walterus de Bullione, Hugo de Daulas. Ego igitur Heinricus gratia dei Romanorum imperator augustus, cum essem in diebus paschę Leodii, rogatu venerabilis Adelberonis Leodiensis episcopi et Olberti eiusdem ecclesię sancti Iacobi abbatis ac fidelis mei Arnulfi comitis de Los, eius advocati, supradictę traditionis testamentum, ut ratum maneat et inconvulsum, signi sigillique mei astipulatione confirmavi, ac tot tantorumque virorum testimonio comprobatum est, quorum nomina subscripta sunt: Adelbero episcopus Leodiensis, Godeboldus episcopus Ultraiectensis, Heinricus episcopus Uirdunensis; Andreas prepositus sancti Lamberti, Philippus prepositus Traiectensis; Alexander et Steppo, archidiaconi; Reinzo, Arnulfus, Reinbaldus, Wido, canonici; Tiebaldus marchio, Godefridus comes Namucensis, Berengerus comes de Sozbach, Arnulfus comes de Los, Gerardus comes de Wassenbergh, Wilelmus comes, Lambertus comes, Gerardus frater Gozuini, Wigerus advocatus sancti Lamberti, Arnulfus de Rode, Wenricus de Caluo Monte, Otto filius Gileberti de Duraco, Arnulfus de Erscloh, Lambertus frater Wenrici; de familia imperatoris: Henricus Houvth, Folmarus, Richardus, Ludouicus et alii multi.

Anno dominicę incarnationis MCXXV, indictione IIIa, anno autem imperii domni Heinrici Romanorum imperatoris XV; actum Leodii; feliciter in nomine domini; pridie kl. aprilis.

Signum domni Heinrici quarti Romanorum imperatoris augusti invictissimi. (M.9.) (SI.D.)

Ego Philippus cancellarius vice Alberti Moguntini archicancellarii recognovi.