(C.) In nomine sanctae et individuę trinitatis. Heinricus divina favente clementia quartus Romanorum imperator augustus. Ad presentis vitę felicitatem et ad eternę beatitudinis meritum nobis proficere speramus, si ęcclesias ab antecessoribus nostris deo constructas defendere et in sua libertate retinere non negligimus. Huius rei gratia Rustenvm sancti Blasii abbatem eiusque confratres sepius nobis conquerentes de multiplici et miserabili iniuria et oppressione, quam a quodam Adelgozo, qui eiusdem ęcclesię advocatiam sibi vendicabat, iamiam diu sustinuerant, tandem apud Nvhvsen in obsidione Wormatię benigne et misericorditer audivimus. Huic audientię et predictę querimonię Wilhelmus Prenestinus episcopus et cardinalis, Adelbertus Mogontinus archiepiscopus, Fridericus Coloniensis archiepiscopus, Godefridus Treuirensis archiepiscopus, Arnoldus Spirensis episcopus, Bruno Argentinensis episcopus, Gotebaldus Traiectensis episcopus, comes palatinus Godefridus multique alii interfuerunt principes. Audita á nobis unâ cum principibus predicti abbatis et confratrum ipsius querimonia super Basileensem episcopum Bertolfvm, a quo iamdictus Adelgoz advocatiam sancti Blasii retinere volebat, idem Basiliensis episcopus inito consilio respondit se pro huius negotii et querimonię responsione non advenisse, insuper cum et ibidem Basileensis ęcclesię fideles aberant (!) ac privilegium illius advocatię retinendę impromptu non haberet. Sed quoniam nostrum non est quemquam intercipere nec in causa aut verbo capere, iudicio et consilio principum presentium ipsi Basiliensi episcopo petenti terminum et locum, quo premunitus ad respondendum cum privilegio veniret, determinavimus. Convenerunt itaque in nativitate domini Argentinę Bertolfus Basiliensis episcopus et sancti Blasii abbas Rvstenvs cum religiosis fratribus, et presidente principum multitudine in nostra presentia de predicta advocatia in medium utriusque, episcopi scilicet Basiliensis et abbatis sancti Blasii, deducta et audita est controversia. Hic Ǒdalricvs sanctę Constantiensis ęcclesię venerabilis episcopus sub obtentu gratię et fidelitatis nostrę ammonitus liberam per omnia ęcclesiam sancti Blasii sub nostra tantum tutela et patrocinio permanere iudicavit, assentientibus omnibus aliis episcopis ceterisque principibus collaudantibus idemque iudicium confirmantibus. Notum igitur sit omnibus Christi fidelibus tam futuris quam presentibus utriusque ęcclesię controversiam pro illa advocatia retinenda auditam et iteratam sepius fuisse in nostra presentia, multiplicis quoque consilii examinatione ventilatam, tandem antiquioris et veracioris privilegii corroboratione ac principum subtilissima diligentia cognita et approbata veritate ęcclesię sancti Blasii libertatem loci a primo Ottone imperatore traditam ac deinde a patre nostro felicis memorię Heinrico imperatore renovatam et confirmatam, liberam quoque electionem advocati iudicio episcoporum omniumque presentium principum retinuit, ea scilicet lege et condicione, ut in electione advocati abbas habeat liberam potestatem consilio fratrum suorum talem eligere, quem ad defendendam libertatem monasterii et iusticiam bonum et utilem atque idoneum cognoscat, qui non pro terreno commodo, sed pro remissione peccatorum suorum ipsam advocatiam habere et bene ac pacifice tractare velit. Si autem, quod absit, non ut advocatus, sed potius calumpniator et pervasor ęcclesię fuerit et ammonitus semel, iterum ac tercio nec emendando satisfecerit, omnino potestatem habeat abbas consilio fratrum et nostro successorumque nostrorum patrocinio hunc reprobare et alium sibi utiliorem undecumque eligere. Et quoniam huic sancti Blasii ęcclesię predictus Adelgoz libertatem antiquam et advocatię auditam condicionem minime observabat, Rustenus abbas consilio fratrum suorum eundem Adelgozvm privilegii auctoritate pro transgressione condicionis oppressum eadem advocatia principum iudicio privavit aliumque electum nostro et confratrum consilio subrogavimus, Cǒnradvm scilicet, filium ducis Bertolfi, cui bannum predictę advocatię iure imperiali dedimus, salva ęcclesię libertate et condicionis auctoritate. Ad huius vero privilegii confirmationem perficiendam sedula ac devota peticio Mathildis reginę dilectę nostrę cum predicti abbatis Rusteni supplicatione interfuit et admodum profuit, maxime tamen pro remedio animę nostrę et parentum nostrorum hanc predictę ęcclesię sancti Blasii cartam conscribi et propria manu corroboratam sigilli nostri impressione iussimus insigniri. Si quis denique temerarius presumptor huius nostri privilegii confirmationem violare presumpserit aut inquietare, auri purissimi C libras componat, dimidium nostre camere et dimidium ipsi ęcclesię. Huius ęcclesię renovatę libertati et privilegio presenti a nobis confirmato idoneę personę presentes interfuere: Ansericus Bisuntinus archiepiscopus, Geroldvs Lausanensis episcopus et cancellarius, Humbertus Gebennensis episcopus, Ǒdalricus Constantiensis episcopus, Stphanus (!) Metensis episcopus, Arnoldvs Spirensis episcopus, Bruno Argentinensis episcopus; Manegoldvs abbas sancti Galli, Bertoldvs Morbacensis abbas, Wernherus abbas sancti Georgii, Bertoldvs abbas de sancta Walpurga, Otto abbas de Steina, Wernherus abbas de Etenheim; alii quoque principes: dux Fridericus, Cǒnradvs eiusdem ęcclesię advocatus, Godefridus palatinus comes, Wilhelmus comes Burgundię, Rǒdolfus comes de Linceburc, Adelbertus comes de Habesburc, Adelbero comes de Phroburc, Wernherus Basileensis ecclesie advocatus, Wecelo comes de Hegerlo, Fridericus comes de Monte Biligardis et frater eius Deodericus, Petrus comes, Folmarus comes de Huneburc, Hugo comes de Tuingen, Burchardus comes de Zolr, Otto de Stusceling, Otto de Salmen, Thietelmus de Tochenburch, Godefridus de Nǒrenberc, Waltherus de Manburon, Heinricus de Wetelberc, Waltherus de Botstein, Thiehelmus de Eiuun, Geroldus de Suercingen, Cǒnrad de Acenstein, Erchenbaldus de Haberch, Erchenbaldus de Forcheim.

Signum Heinrici quarti Romanorum imperatoris (M.9.) invictissimi. (SI.4.)

Phillippus cancellarius vice Adelberti Mogontini archicancellarii recognovi.

Acta sunt hęc anno dominice incarnationis MCXXV, indictione III; data Argentinę VI. id. ian.; feliciter amen.