In nomine sancte et individuę trinitatis. Heynricus dei gratia quartus Romanorum imperator augustus. Omnibus fidelibus notum fore volumus, quod Romani Monasterii prior Artaldus nomine postulavit a nobis, ut bona, quę predecessores nostri reges seu imperatores eidem monasterio contulerant et fratribus ibi deo et beato Petro famulantibus, nos eis nostra imperiali auctoritate firmaremus. Quibus nimirum rationabilibus peticionibus ob remedium anime nostrę pium prebentes assensum confirmamus prefato monasterio fratribusque deo et beato Petro apostolo ibidem nunc et in futurum famulantibus tam ęcclesiam de villa, quę dicitur Aplis, cum omnibus ad eandem ęcclesiam pertinentibus quam et cętera omnia, quę rex Rodulfus vel reges alii seu reginę vel imperatores sive imperatrices eidem monasterio contulerunt et scriptis suis confirmaverunt. Ea inquam omnia iamdicto monasterio iure perpetuo quiete et inconvulse possidenda concedimus atque sancimus, salvo in omnibus iure Lausannensis ęcclesię. Ut vero presentis paginę cautio firmioris in posterum obtineat auctoritatis vigorem, sigilli nostri eam [impressione iussimus insigniri].

Signum Heynrici quarti Romanorum imperatoris [invic]tissimi.

Geroldus cancellarius et Losanensis ęcclesię episcopus recognovi.

Anno dominicę incarnationis millesimo centesimo vicesimo quinto, indictione terciadecima; data Argentinę V. kl. ianuarii.