In nomine sanctę et individuę trinitatis. Henricus divina favente clementia quartus Romanorum imperator augustus. Cum omnium fidelium petitionibus et necessitatibus subvenire debeat imperialis maiestas, multo magis his est impertienda eius beneficii clementia, quos religionis pręcipue exuberare facit gratia. Quapropter notum esse volumus omnibus imperio nostro subiacentibus, quod petitione venerabilis viri Bernardi Parmensis episcopi et dilectissimi cognati nostri Pontii Cluniacensis abbatis cuncta monasteria Vallimbrosanę congregationis ubilibet posita sub nostri imperii tuitione ac defensione suscepimus. Statuimus itaque, ut nullus archiepiscopus. episcopus, dux, marchio, comes, vicecomes, nulla civitas. nulla alia magna seu parva persona, ecclesiastica sęcularisve, prędicta monasteria inquietare audeat vel eorum possessiones seu reliqua bona auferre, minuere [vel] quoquomodo vexare pręsumat, sed cuncta, quę eisdem monasteriis oblata sunt vel offerri contigerit vel aliis quibusque modis iuste acquisita sunt vel in futuro acquisierint, libera et quieta servorum dei servitiis et utilitatibus subiaceant. Pręterea nostra imperiali auctoritate concedimus [et] confirmamus, quicquid in pręsenti possident vel in futuro possessuri sunt, ut eisdem monasteriis rata et illibata permaneant et ab omnibus exactionibus seu molestiis libera. Huius autem nostri imperialis pręcepti si quis, quod absit, violator extiterit, sciat se compositurum auri purissimi libras centum, medietatem camerę nostrę et medietatem prędictis monasteriis. Et ut [hoc] verius credatur et firmius custodiatur, manu nostra subscripsimus et sigilli nostri impressione insigniri iussimus.

Signum Henrici quarti Romanorum imperatoris <augusti> invictissimi.

Phi(lippus) cancellarius recognovit vice archicancellarii Alberti Maguntini archiepiscopi.

Huius rei testes sunt: Arnoldus Spirensis episcopas, Erbipolensis electus Gebeardus, Odericus Eistatensis episcopus.

Actum est hoc anno ab incarnatione domini millesimo centesimo [X]XIIII, indictione II; datum Bouenengę nonas augusti.

Hoc etiam Guillelmus Pręnestinus episcopus sua corroboravit pręsentia.