(C.) In nomine sanctę et individuę trinitatis. Notum sit omnibus Christi fidelibus tam futuris quam presentibus, qua conditione et privilegio Otto Babinbergensis octavus episcopus et Otto palatinus comes monasterium Enzistorf ad honorem dei omnipotentis construxerint et dedicaverint, videlicet ut éadem ęcclesia mortuo abbate liberam potestatem habeat canonice eligendi sibi abbatem, primo de eâdem cella, si quidem in ea idoneus quisquam inveniatur, sin autem, electione fratrum sanioris consilii ex alio cenobio assumatur. Ille vero sic canonice electus abbas veniat ad dominum Babinbergensem episcopum et ab eo canonice accipiat baculum. Quodsi dominus episcopus per aliquam sinistram occasionem ei fratribusque suis contrarius fuerit, liberam habeat potestatem redeundi ad cellam suam et consilio fratrum suorum a Ratisponensi episcopo Romanę ęcclesię obędienti consecretur. Ex eadem quoque cella per singulos annos pro signo obędientię et subiectionis corporale persolvatur ęcclesiae Babinbergensi. Eadem quoque ęcclesia semper permaneat in defensione et advocatia palatini comitis Ottonis et heredum suorum hac conditione, ut nunquam ibi placitum habeat, nisi pro fratrum utilitate ab abbate invitatus fuerit, et tunc modium tritici tantum et cętera ad hoc pertinentia in caritate ad servicium accipiat. Quodsi advocatus per tirannidem suam predicto cenobio aliquam forte fecerit iniuriam, spirituali gladio ab episcopo defendatur. Et ut hoc privilegium stabile et inconvulsum perpetualiter permaneat, ego Heinricvs huius nominis quintus dei gratia Romanorum imperator sigilli nostri impressione firmamus et corroboramus; in nomine domini amen.

Acta sunt hęc anno domini millesimo centesimo XXoIIIIo, indictione XIIIma, in curia Bauenberch, VII. kl. mai; feliciter amen.

Signum Heinrici quarti Romanorum imperatoris invictissimi. (M.9.) (SI.)

Philippus cancellarius vice Adelberti Mogontini archicancellarii recognovi.