(C.) In nomine sancte et individue trinitatis. Ego Henricus divina favente clementia quartus Romanorum imperator augustus. Notum habeant omnes tam presentes quam futuri, quod Dauentrensibus pro devotissima fidelitate sua, quam nobis exhibuerunt, emptionem baptismatis et sepulturarum, quam hactenus contra leges divinas et humanas exhibuerunt, consilio et iudicio episcoporum et principum catholicam fidem tenentium prorsus remisimus ac, ne ulterius apud illos puerorum baptisma mortuorumque sepultura conducatur, consensu Godebaldi Traiectensis ęcclesię episcopi districtione imperiali interdiximus. Preterea, ut ipsos eorumque posteros ad exequendam fidelitatem amplius animatos corroboremus, denarios domorum eisdem Dauentrensibus remisimus ęcclesiamque nomine Raalt, quę Lifgero abiudicata fuit, loco eorundem denariorum preposito et confratribus substituimus. Ut autem huius nostrę concessi[o]nis decretum ratum et inconvulsum remaneat, hanc inde cartam conscribi iussimus nostrique sigilli auctoritate insignivimus. Huius rei testes sunt: Fredericus Coloniensis archiepiscopus, Bruno Treuerensis archiepiscopus, Albero Leodiensis episcopus, comes Gerardus de Gelra, comes Arnulfus de Cliva, Arnulfus de Rotha, Stephanus Oyensis.

Signum Henrici quarti Romanorum imperatoris (M.9.) invictissimi. (SI.4.)

Philippus cancellarius recognovi vice Adelberti Mogontini archicancellarii.

Data Traiecti anno incarnationis dominicę MCXXIII, indictione XIIIa, IIII. non. aug..