In nomine sancte et individue trinitatis. Henricus divina favente clementia quartus Romanorum imperator augustus. Imperialem celsitudinem nostram decet predecessorum nostrorum pia exempla sectari et ecclesias deo dicatas ab incursu et infestatione malignantium diligenti cura defensare eisque a bonis ac religiosis viris collata bona retinere et conservare. Hac igitur ratione et discretione utiliter inspecta iura, auctoritates, privilegia, libertatem a sancte Romane sedis pontificibus sive ab antecessoribus nostris regibus vel imperatoribus sancte Luxouiensi ecclesie concessam et contraditam confirmamus, corroboramus et auctorisamus. Insuper imperiali auctoritate nostra per omnem eiusdem ecclesie abbatiam tessariam omnimodis fieri prohibemus et interdicimus. Hoc autem principum nostrorum consilio, fidelium nostrorum petitione, specialiter autem pro remedio anime nostre benigne fecimus, quia vir venerabilis Hugo, noster consanguineus atque eiusdem ecclesie abbas, privilegia imperatorum, Lotharii scilicet ac Ludouici, nostre maiestati presentavit, in quibus continebatur, qualiter Pippinus quondam rex et imperator Carolus per eorum auctoritatem concessissent eidem monasterio et ibidem deo servientibus privilegium de quolibet negotio, undecumque illud fiscus exigere poterat. Cuius precibus ob amorem dei libentissime assensum prebentes hoc auctoritatis nostre et confirmationis preceptum iamdicto monasterio fieri iussimus [et] sigilli nostri impressione insigniri fecimus, ut homines eiusdem monasterii necessitatibus ad diversa negotia servientes per universum regnum imperiumque nostrum nostro imperiali banno libere [secur]e discurrant, et nullus iudex publicus aut exactor nullum theloneum, portaticum, pontaticum, gest[aticum] de ipsis aut eorum hominibus, undecumque fiscus accipere consuevit, ullatenus exigere p[resumat], nec in pontibus nec in aquis, sicut prediximus, nec in mercatis nec in quibuslibet locis, sed p[er] quecumque castella, portus vel quelibet loca homines et negotiantes ipsius monasterii ire, r[edire], vendere et comparare absque alicuius contradictione prevaleant. Si quis autem, quod absit, h[anc] nostre corroborationis paginam violare presumpserit, auri purissimi centum libras compon[at] et in scriniis imperatoris reponat. Huic concessioni principes et fideles nostri adfuerunt: Berto[ldus] Basileensis episcopus, B. Argentinensis episcopus, A. Fercellensis episcopus, Stephanus Metensis ep[iscopus], Godefridus palatinus, Hugo comes, Albero comes, Albertus comes.

Signum Henrici quarti Romanorum imperatoris (M.) invictissimi.

Philippus cancellarius recognovi vice Adelberti Mogont[ini] archicancellarii.

Data Argentine, anno dominice incarnationis MCXXIII, indictione XIII, V. kal. iulii.