In nomine sancte et individue trinitatis. Dominica protegente [clementia] Heinricus rex. Notum ergo facimus omnibus Christi nostrique fidelibus tam futuris quam presentibus, qualiter nos Staurencibus omne ius, quod a Karolo rege de terra cum eis est institutum et ab ipsius loci probatissimis est decretum et inventum et quod ab aliis sapientibus patrisque nostri fidelibus est collaudatum, tam legale ius quam morale, et illud precipue, quod comes Egbartus specialiter eis maiore quodam dilectionis affectu constituit, [confirmamus], scilicet ut cum extraneis aut etiam inter se duellum pro aliqua causa non confligant, generale placitum, quod dicitur vodthing, non observent pecuniamque, quam et de perpetrato homicidio debent, exinde inter se dividant et nullis aliis excepto suo comite superiori, prout eis placuerit, partem inde distribuant, fracturas et combustiones domorum non pacientur inter se nisi ob has quatuor causas, utpote si quis hominem vel mulierem interfecerit morte, que dicitur morth, aut si quis pacem, quam omnis possi[de]t Frisia scilicet in domibus, per homicidium violaverit aut communem pacem tocius civitatis illius infregerit aut mulierem vi in ea oppresserit, ob has IIIIor causas permittimus fracturas et combustiones domorum, ita tamen, ut alicuius innocentis domus, licet etiam facientibus consanguinitate coniunctus sit, dampnum non paciatur. Quodsi aliquis stipantibus parentibus [et] amicis penas pati noluerit aut comiti, ne fiat, contradixerit aut comes aliqua causa inductus facere noluerit, inimicus sit regis et tota substancia communis in manu sit regis. Hec omnia scripta superius pater meus ipsis Staurencibus scripsit et consignavit et nos etiam consignamus et confirmamus. Scripsimus eis insuper de tholonio, quantum dare debeant euntes et redeuntes per Renum, et de comitatu vulgariter gheferdi, contra Naghelam. Quod si quis eis infregerit, iugiter sit inimicus regis. Et ut hec semper rata permaneant, hanc cartam sigilli nostri inpressione signamus et Coloniensem episcopum suo sigillo sub banno consignari facimus.

Fredericus dei gracia Coloniensis archiepiscopus omnibus fidelibus salutem. Omnes, qui huic regum nostrorum pie ordinationi contradixerint, excommunicamus, sive clerici sive laici fuerint, et sacerdotibus Frisie precipimus sub banno, ne aliquem supradicte legis violatorem in ecclesia vel in atrio ecclesie vivum vel mortuum suscipiant. Quod si quis fecerit, nisi satisfecerit, anathema sit. Et ut hec in perpetuum inconvulsa permaneant, hanc cartam iussu imperatoris nostro sigillo sicut ipse consignamus.

Data anno ab incarnatione domini MoCoVIII; acta Maguncie; feliciter.