(C.) In nomine sanctae et individuę trinitatis. Heinricus divina favente clementia quartus Romanorum imperator augustus. Si fidelium nostrorum dignis peticionibus benigne acquieverimus, si beneficiis et prediis eos sublimaverimus, antecessorum nostrorum regum sive imperatorum exempla tenemus et eorum successores nobis benivolentiores et devotiores habebimus idque ad honorem atque utilitatem nostri regnique provenire non dubitamus. Omnium igitur tam presentium quam futurorum Christi fidelium sollers noverit industria, qualiter nos fideli nostro et ministeriali Eberaddo eiusque contectali Adelheidi illorumque successoribus quoddam iure imperii nostrę proprietatis predium, silvam scilicet quandam ad regiam nostram curtim Wisibad vocatam libere et absolute pertinentem, benigno donavimus animo. Et ut plenius nostrę benivolentię piam ac devotam cognosceret affectionem, idem allodium cum omni utilitate, quę vel in presenti vel in futuro inde provenire potest, agris videlicet, terris cultis et incultis, pratis, pascuis sive compascuis, aquis aquarumve decursibus, piscationibus, molis, molendinis, viis et inviis, exitibus et reditibus, quesitis et inquirendis, in proprium eidem Ebehardo in expedicione Wesfalię concessimus. Hoc autem sine diminutione regni fecimus, quia parem eum eiusdem predii esse cognovimus. Ut autem huius nostre concessionis auctoritas stabilis et inconvulsa permaneat, hanc inde cartham manu propria corroboratam scribi et sigilli nostri impressione iussimus insigniri. Si quis autem, quod absit, hoc preceptum nostrum temere neglexerit, auri purissimi C libras persolvat scriniis imperatoris. Huic concessioni presentes affuerunt: Bruno Spirensis episcopus, Cuonradus Curiensis episcopus, Gebehardus Herbibolensis episcopus, Heinricus dux Bauuariorum, Godefridus palatinus comes; abbas Wldensis Ǒdalricus; Bertolfus comes de Lindenfels, eius nepos Conradus, Ǒdalricus de Hurningen, Cuono, Conradus de Walrestein, Robertus de Vrsin, Codefridus de Norinberch, Hartmannus comes de Tilingen, Humbertus de Linceburch; alii quoque fideles nostri: Folcmarus, Eberardus, Burchardus, Conradus, Heinricus, W[e]rnherus, Heinricus de Nichastel, Egeno camerarius.

Signum Heinrici qu[a]rti Romanorum imperatoris (M.9.) invictissimi. (SI.4.)

Philippus cancellarius recognovi vice Adelberti Mogontini archicancellarii.

Data Spirę anno dominicę incarnationis MCXXIII, indictione XIIIma, VIII. kl. aprilis.