In nomine sanctę et individuę trinitatis. Henricus divina favente clementia quartus Romanorum inperator augustus. Quoniam transeunte et succedente tempore, quęcumque fiunt aut facta sunt, ipsa antiquitate a memoria hominum recedunt, scripto annotare et non solum presentium, sed etiam ad noticiam futurorum transmittere curavimus, qualiter cives Bobardię capellam sanctę Marię super ibidem positam – concambio amplius quam in decuplum multiplicato – a basilica et matre ipsius loci, quo ante pertinebat, absolverunt et prediis suis iuxta facultates suas ditaverunt. Hoc enim pia devotione decreverunt, ut eundem locum servicio dei manciparent et alicui religioso abbati sub regulari disciplina ad honorem dei ordinandum contraderent. Communicato itaque tam pauperum quam divitum consilio omnes una voce concordi voluntate dominum Conradum de Walthécco Treuerim miserunt et per manum eius beato Euchario propter innumerabilia sanctorum patrocinia, quorum memoria ibi celebris habetur, in perpetuum posidendum et regulariter ordinandum legitima donatione delegaverunt. Rogabant autem me omnes, ut concambium et donationem, quam pro remedio animarum suarum deo et beato Euchario fecerant, clementi assensu corfirmarem et eundem locum cum prediis nunc possessis et deinceps possidendis manu mea propter speranda eorundem sanctorum sufragia regio scilicet et imperiali iure libertati vendicarem, ita ut absque contradictione cuiusque personę solus abbas sancti Eucharii habeat locum illum ordinare et disponere. Cumque id omnes multiplicatis precibus tam fideliter expeterent, cupiens eorum communicare beneficiis et mercedis fieri particeps eundem locum manu mea libertati vendicavi et beato Euchario in perpetuum possidendum sigilli mei inpressione reconsignavi, stabilivi et corroboravi, astipulantibus et annitentibus multis qui subnotati sunt testibus: Gerlach comes et frater eius Emicho, Odelrich de Hurninga, Hugo comes de Dagesburc, Folcmar, Arnolt, Conrath, Germar, Annecho, Helzo, Gotebreth et frater eius Gotefrith, omnes quoque divites et pauperes in loco.

Signum Henrici quarti Roma(M.7.)norum imperatoris invictissimi.

Philippus cancellarius recognovi vice Adelberti Moguntini archiepiscopi. (SI.F.)