(C.) In nomine sanctae et individuae trinitatis. Heinricus divina favente clementia Romanorum IIIItus imperator <et> augustus. In examine cun[c]ta conspicientis ęquale meritum credimus fore dantis et corroborantis. Credimus etiam ad regalem nostram maiestatem pertinere totius regni curas precipueque omnium ęcclesiarum commoda considerare et omnia eisdem adversantia sub omni festinatione abolere, ne vel gravi incommoditate vilescant vel qualibet pro nostra culpa orta occasione a pristino cultu et religione recedant, quatenus, dum hęc pro amore pariterque timore dei fideliter peragimus, illorum, qui hęc pio affectu deo contulerunt, meritis et gloria communicemus. Proinde omnibus Christi fidelibus tam futuris quam presentibus notum esse volumus, qualiter ob hanc spem per interventum Adelberti Scafhusensis abbatis et fratrum suorum, pro remedio animę nostrę et petitione principum nostrorum eundem locum a comitibus pie memorię Eberhardo et filio eius Burchardo pro suis suorumque parentum animabus in abbatiam divina inspirante clementia in honorem Saluatoris nostri et omnium sanctorum sublimatum et ab apostolicis viris, videlicet Gregorio, Vrbano, Paschale, Kalixto, in ius perpetuum et tutelam apostolice sedis susceptum consensu fidelium nostrorum sanccimus et omnium contradictione remota regalis nostrę maiestatis auctoritate corroboramus. Omnes etiam res mobiles et inmobiles eiusdem monasterii, quas prefati comites vel alii quique fideles pro ardore celestis patrię ibidem larga manu contulerunt vel postmodum tradere cupiunt, ea ratione confirmamus, ut fidelis noster eiusdem loci abbas eiusque in perpetuum successores secura eas tranquillitate possideant et liberam potestatem habeant res et proprietates ęcclesię cum consensu monachorum et fratrum deo ibi servientium ordinare, componere, commutare et augmentare. Nostra igitur auctoritate sanccimus, ut in allodiis Werinheri de Chiricheim, Arebonis et uxoris eius Mathildis de Wertungin et in cella Arnoldi Hildiniswillare aliisque cellulis eidem monasterio subiectis, foris, mercatis, monetis, naulis, theloneis, villis, vicis, areis, servis, ancillis, tributariis, decimis, forestibus, silvis, venationibus, piscationibus, molendinis, aquis aquarumque decursibus, campis, pratis, pascuis, terris, cultis et incultis, ęcclesię ornamentis, vel quicquid ad presens illuc pertinet aut ex his amplicari (!) potest, nulla sit infestatio tirannorum, nulla potestas magna vel parva ibi per violentiam irruat. Abbas autem cum fratribus advocatum, quem voluerint constituant; qui si postmodum monasterio inutilis fuerit, imperiali iudicio deponatur et alius, qui dignus est, ab abbate et fratribus preficiatur. Si quis hoc preceptum nostrum violare presumpserit, secundo terciove admonitus si fratribus non satisfecerit, auri purissimi C libras imperatori persolvat aut ab omni dignitate sua deponatur. Et ut hęc nostrę auctoritatis traditio rata et inconvulsa permaneat, hoc privilegium inde conscriptum manu propria corroborantes sigilli nostri impressione iussimus insigniri.
Acta sunt hęc in Babinbergensi curia, anno dominice incarnationis MCXXII, indictione XII[I].
Huius rei testes nostri sunt principes: Rǒggerus Magidiburgensis archiepiscopus, Otto Bauenbergensis episcopus, Reginhardus Haluerstatensis episcopus, Gotebaldus Misinensis episcopus, Ǒdalricus Eistatensis episcopus, Gebehardus Wirziburgensis episcopus, Arnoldus capellarius; alii quoque principes: Heinricus dux Bawariorum, marchiones Tiepaldus et Engilbertus, Otto, Godefridus, palatini, Beringarius comes, Lǒdewicus comes.
Signum Heinrici quarti Roma(M.9.)norum imperatoris invictissimi.
Philippus cancellarius recognovi vice archicancellarii. (SI.D.)