(C.) In nomine sanctę et individuę trinitatis. Heinricus divina favente clementia quartus Romanorum imperator augustus. Notum fieri volumus tam presentibus quam futuris Christi fidelibus, quod Godefridus comes et frater eius Otto castrum Capenberg, quod iure allodii possidebant, cum adiacentibus quatuor curiis Nette, Werne, Heile, Alsteden deo patri omnipotenti et beatę dei genitrici Marię et beatissimis apostolis Petro et Paulo sanctisque omnibus spe futurę retributionis animati optulerunt, tradentes hoc venerabili fratri Norberto suisque fratribus sibi subiectis eorumque successoribus in canonica professione secundum apostolica instituta ibidem degentibus; nos ipsis fratribus ad imperiale patrocinium confugientibus traditionem hanc ratam et inconvulsam permanere statuimus. Decernimus etiam et firmamus ex rogatu eorundem fratrum, quod nullus episcopus vel eiusdem ecclesię futurus prelatus potestatem habeat regulam, professionem, institutionem assumptam inmutare vel indulgentia laxioris licentię corrumpere. <Advocatus ibi nullus sit, nisi quem fratres ipsi unanimiter elegerint; qui si inconmodus vel inutilis fuerit, si semel, secundo vel tertio correptus non emendaverit, alium eligendi liberam habeant facultatem>. Hoc et fideles dei scrire volumus, quod eidem Godefrido eiusque fratri pro redemptione animę meę supradicto sacerdote pro eis intercedente regiam offensam ex animo condonamus, obsides eorum manumittimus et, quicquid causę vel exactionis in ipsos habuimus vel habere possemus, ęternaliter postponimus. Ad hanc vero nostram traditionem testes ydoneos adhibuimus: Adelbertum Mogontinum archiepiscopum, Fridericum archiepiscopum Coloniensem, Hartwicum Ratisbonensem episcopum, Ottonem Bauenbergensem episcopum, Brunonem Spirensem episcopum, Herimannum Augustensem episcopum, Gebehardum Herbipolensem episcopum; alii quoque principes: Heinricus dux Bawariorum, Fridericus dux, Symon dux, Pertolfus dux et frater eius Cůnradus, marchio Theipoldus, marchio Engelbertus, Berengarius comes. Ut autem hęc nostrę traditionis auctoritas stabilis et inviolata omni permaneat evo, hanc inde cartam scribi et sigilli nostri impressione iussimus insigniri. <Preterea quascumque possessiones, quęcumque bona in terris, vineis, mancipiis, censibus, decimis, molendinis, aquis aquarumve decursibus, pratis, pascuis, nemoribus, campestribus, montibus, collibus, vallibus aut quibuslibet aliis rebus predicta Capenbergensis ecclesia in presentiarum possidet aut in futurum concessione pontificum, largitione regum vel principum, oblatione fidelium seu aliis iustis modis poterit adipisci, omnia ei imperatoria auctoritate confirmamus. In quibus hęc propriis vocabulis duximus exprimenda: Mengede, Curede, Sorbeke, Wisele, Weshein cum mansis et mansionariis et universis usibus et iusticiis suis. Si qua igitur ęcclesiastica secularisve persona hanc nostrę constitutionis paginam sciens contra eam venire temptaverit, si secundo terciove commonita presumptionem suam non correxerit, indignationis nostrę pęnam sentiet>.

Signum Heinrici quarti Romanorum imperatoris (M.7.) invictissimi. (SI.4.)

Phylippus cancellarius recognovi vice archicancellarii.

Data anno dominicę incarnationis MoCoXXoIIIo, indictione XIIIa, apud Lobwisen, quando dominus imperator anulum et baculum ęcclesię remisit.