In nomine sanctę et individuę trinitatis. Ego Heinricus dei gracia Romanorum imperator augustus pro amore dei et sanctę Romanę ęcclesię et domini papę Cal. et pro remedio animę meę dimitto deo et sanctis dei apostolis Petro et Paulo sanctęque catholicę ęcclesię omnem investituram per anulum et baculum et concedo in omnibus ęcclesiis, quę in regno vel imperio meo sunt, canonicam fieri electionem et liberam consecrationem. Possessiones et regalia beati Petri, quę a principio huius discordię usque ad hodiernam diem – sive tempore patris mei sive etiam meo – ablata sunt, quę habeo, eidem sanctę Romanę ęcclesię restituo, quę autem non habeo, ut restituantur, fideliter iuvabo. Possessiones etiam aliarum omnium ęcclesiarum et principum et aliorum tam clericorum quam laicorum, quę in werra ista amissę sunt, consilio principum vel iusticia, quę habeo, reddam, quę non habeo, ut reddantur, fideliter iuvabo. Et do veram pacem domino papę Calixto sanctęque Romanę ęcclesię et omnibus, qui in parte ipsius sunt vel fuerunt; et in quibus sancta Romana ęcclesia auxilium postulaverit, fideliter iuvabo; et de quibus mihi fecerit querimoniam, debitam sibi faciam iusticiam. Hec omnia acta sunt consensu et consilio principum, quorum nomina subscripta sunt: Adelbertvs archiepiscopus Mogontinus, F. Coloniensis archiepiscopus, H. Ratisbonensis episcopus, O. Bauenbergensis episcopus, B. Spirensis episcopus, H. Augustensis, G. Traiectensis, Ǒ. Constanciensis, E. abbas Wldensis, Heinricus dux, Fridericus dux, S. dux, Pertolfus dux, marchio Teipoldvs, marchio Engelbertus, Godefridus palatinus, Otto palatinus comes, Beringarius comes. (+) Ego Fridericvs Coloniensis archiepiscopus et archicancellarius recognovi.

(B.D.)