In nomine sancte et individue trinitatis. Heinricus divina favente clementia quartus Romanorum imperator augustus. Iusticiam cuique facere cum omnium sit generaliter, nostri solummodo est principaliter, quoniam ad hoc imperiali celsitudine ceteris videmur preminere mortalibus, ut iudicium et iusticiam faciamus omnibus iniuriam patientibus. Unde fidelium nostrorum tam presentium quam futurorum nolumus latere dilectionem, qualiter fidelis noster Berengozvs Werthinensis ecclesię abbas nostram imperialem adivit celsitudinem postulans videlicet, quatinus allodium, quod ab avo nostro Heinrico pie memorię augusto pro remedio animę suę parentumque suorum in villa, quę dicitur Eitera, sanctę Marię fuerat contraditum, sed per violentiam comitis Růtberti et uxoris suę Ermenthrudis iam diu iniustę constat ablatum, eidem monasterio per iusticiam restitueremus et restitutum nostra imperiali auctoritate confirmaremus. Cuius rationabili ac iustę peticioni pro divino respectu parentumque nostrorum ac nostri remedio assensum prebentes prefatum allodium, quod respicit ad villam, quę dicitur Eitera, quod situm est inter hos fluvios Renum et Leccam, Leccam et Islam, cum agris, pascuis, silvis, aquis aquarumque decursibus, quesitis et inquirendis, terris etiam cultis et incultis et cum omnibus appendiciis sanctę Marię sanctoque Livdgero iusto fidelium nostrorum iudicio ratione ea reddimus atque firmamus, ut nulla persona ecclesiastica sive mundana prefatum allodium eidem ęcclesię ultra quoquomodo alienare presumat, sed pro remedio animę nostrę parentumque nostrorum inibi semper ratum et inconvulsum permaneat. Et ut hęc nostrę restitutionis digna confirmatio nullo umquam cassari possit ingenio, kartam hanc inde conscriptam manu propria firmamus et sigilli nostri impressione insigniri iussimus.

Signum domni Heinrici (M.) quarti Romanorum imperatoris augusti. (SI.F.)

Bruno cancellarius ad vicem domni Adelberti archicancellarii recognovi. Data VI. kl. iunii, anno dominicę incarnationis MCXXIIo, indictione XVa, anno autem regni domni Heinrici XXIIIo, imperii vero XIIo; actum Traiecti; in dei nomine feliciter amen.