(C.) In nomine sanctę et individuę trinitatis. Heinricus divina favente clementia quartus Romanorum imperator. Si animę nostrę pericula humana fragilitate undique accumulata timentes pro his delendis sanctę dei ęcclesię curam gerimus fideliumque nostrorum petitionibus clementer annuere condescendimus, honorem nostrum secularem diffamari deique clementiam nullomodo dubitamus nobis placari. Notum igitur sit omnibus tam presentibus quam futuris Christi fidelibus, qualiter nos ob remedium animę nostrę et piam memoriam patris nostri et nostram perpetuam felicitatem servis domini nostri Iesu Christi, scilicet abbati Cvnoni eiusque successoribus et monachis, qui in cenobio Sigebergensi militant, ei sola dictante karitate concedimus et presentis cartę testimonio confirmamus, ut, si quid metalli vel pecunię in ullo possessionum ipsorum fundo sive loco tellus quęrentibus exposuerit ex his, quę avaro sinu multa nobis abscondit, iuris ipsorum sit nec molestus quisquam sit illis pro iure regio, quia, quod ad nos attinet, donamus tamquam carnale, ut bona ipsorum spiritualia mereamur metere. Super hac autem concessionis nostrę benivolentia ne ullus mortalium supradictum abbatem fratresque sibi commissos inquietare vel iniuriare presumat, hanc inde cartam scribi et sigilli nostri impressione iussimus insigniri. Hanc autem nostram concessionem sua confirmaverunt presentia Fridericvs Coloniensis archiepiscopus, Godeboldus Traiectensis episcopus, Theodericus Monasteriensis episcopus, Godefridus dux Louaniensis, Cůnradus dux, Adelbertus comes Namucensis, Gerhardus comes de Gelra eiusque filius, Arnoldus comes de Cliue, Giselbertus de Duraz.

Signum Heinrici quarti Romanorum imperatoris (M.9.) invictissimi.

Bruno cancellarius recognovi vice archicancellarii.

Data Aquisgrani anno dominicę incarnationis domini MCXXII, indictione XV, IIII. kl. april.. (SI.4.)