(C.) In nomine sanctę et indinidue (!) trinitatis. Heinricus divina favente clementia quartus Romanorum imperator augustus. Si quid locis divino cultui mancipatis nostrę largitatis stabilimus munificentia, divinę pietatis nos inde credimus et minime ambigimus remunerandos magnificentia. Sic enim predecessorum nostrorum regum vel imperatorum meritis nos assotiamus, si ea, quę pro eternę vitę remuneratione ipsi locis deo dicatis contulerunt, nostrę auctoritatis consensu stabilimus et corroboramus. Unde omnium presens et futura cognoscat industria, qualiter dignitas iudiciaria in tota orientali Francia, a predecessoribus nostris regibus vel imperatoribus ad domum in honore sancti Saluatoris et sanctę dei genitricis Marię sanctique Kiliani martyris Christi in urbe Wirciburch dono tradita, nostris temporibus inde est alienata. Erlungus autem Wirceburgensis ęcclesię presul per interventum coniugis nostrę Mathildis et Herimanni Augustensis episcopi et Ǒdalrici Eistetensis episcopi et Erlolfi Wldensis abbatis et Gerhardi Merseburgensis episcopi et Godefridi comitis palatini et Beringarii comitis aliorumque fidelium nostrorum suppliciter adiit maiestatem nostram cum universo cleri, milicię, plebis eiusdem loci conventu rogans, ut honorem prefatę dignitatis regali munificentia et nostrę auctoritatis clementia ecclesię memoratę tam pro obsequio suę fidelitatis quam pro remuneratione divinę pietatis resti[t]ueremus. Cuius quidem peticioni primum pro amore Christi et sanctę dei genitricis et pretiosi martyris Kiliani, deinde pro nostrę salutis provectu satisfacientes per hoc imperialis magnificentię insigne restituimus, confirmamus et validissime corroboramus ad domum prefatam sancti Salvatoris et pretiosi martyris Kiliani predictam dignitatem cum omni potestate, non imminuens terminos a predecessoribus nostris ei prefinitos. Et huius nostrę concessionis imperiali auctoritate prefinimus, ut sine omnium contradictione maiorum sive minorum, regum vel principum, in iure dictę ęcclesię perpetuo permaneat et solus predictus ępiscopus et sui successores hanc iudiciariam potestatem potestative iuxta antecessorum nostrorum tradicionem exercendi potestatem habeat. Ut autem hęc nostrę auctoritatis restitutio et super hac re facta confirmatio a cunctis inviolabilis ultra permaneat, hanc nostrę donationis preceptionem inde conscriptam sigillo nostro signari iussimus manuque propria, ut infra videtur, subscripsimus.

Signum Heinrici quarti Romanorum imperatoris (M.9.) invictissimi. (SI.4.)

Bruno cancellarius recognovi vice archicancellarii.

Data Wirceburch, anno dominicę incarnationis MCXX, indictione XIIma, in festo Philippi et Iacobi, in ęcclesia sancti Kiliani; feliciter amen.