(C.) In nomine sancte et individue trinitatis. Heinricus divina favente clementia quartus Romanorum imperator augustus. Noverit omnium tam presentium quam futurorum industria, qualiter nos divinę inspirationis provocati admonitu et principum nostrorum consilio monasterium in monte sancti Georgii positum canonicis ibi institutis claustrali ambitu adornare eiusque facultates rebus necessariis decreverimus ampliare. Silvam enim quandam, quę vocatur Al, eidem monasterio adiacentem, ex clericorum ibidem commanentium consensu quibusdam civibus nostris Goslariensibus, quorum nomina in fine cartę invenies conscripta, locavimus, quatinus eorum sollerti labore exstirpata in agros redigeretur et ex[inde] prefato cenobio fructus aliquis utilior proveniret et redderetur, ea videlicet conventionis interposita lege, ut transacto triennio ex eo tempore, quo eos silvam excolendam accepisse constiterit, ex singulis mansis, cultis sive incultis, ipsi eorumque successores quinque solidorum censum predictę ęcclesię persolvi procurarent. Huic autem concessioni nostrę idoneos adhibuimus testes, quorum nomina hęc sunt: Cǒnradus Osnabrugensis episcopus, Gerardus Merseburgensis episcopus, alii quoque principes: Lutherius dux, Rǒdolfus marchio, Fridericus palatinus, Wibertus comes, Heinricus marchio, Fridericus comes, Herimannus comes, Eppo huius loci procuratus (!). Hoc etiam Mathildis regina sua corroboravit presentia. Ut autem huius concessionis auctoritas stabilis et inconvulsa permaneat, hanc cartam inde conscribi et sigilli nostri imp[re]ssione iussimus insigniri. De Goslariensibus etiam civibus hos habemus testes: Fochelinus scilicet, Heriszo, frater eius Lanfridus, Hertwardus, Sebertus, Folcmarus, Lucemannus, Ǒdelbertus, Bernardus et fratres eius, Amecho et filii eius, Brunincus et frater eius Acco, Tetelinus, Benecho, Wecelin, Benno.
Hoc autem factum est tempore Pilegrini sancti Georgii prepositi necnon etiam Egelberti prepositi.
Bruno cancellarius recognovi (M.9.) vice archicancellarii. (SI.4.)
Data autem Goslarię MXCIIIIIIIIIno (!) anno incarnationis domini, XII. kal. februarii.