In nomine sancte et individue trinitatis. Henricus dei gratia quartus Romanorum imperator augustus. Dum utilitatibus sancte dei ecclesie pio favore consulimus, antecessorum nostrorum statuta non solum confirmamus, verum etiam augmentare curamus, idque ad profectum totius imperii a deo nobis collati congruere haudquaquam diffidimus. Dignum est etiam, ut celsitudo regalis principum peticionibus eo libentius faveat, quo promptius eos in sua perseverare perspicit fidelitate. Omnibus igitur tam presentibus quam futuris notum esse volumus nos consilio et petitione fidelis nostri Godefridi videlicet ducis et marchionis concessisse ecclesie sancti Michaelis archangeli, que est sita in burgo, qui dicitur Anduerp, omnem decimam, que continetur a terminis Zantfliten usque Olmeremuthen, ita ut quartam eiusdem decime partem ecclesie prepositus sibi retineat et reliquas in usus fratrum conferat. Huius autem nostre traditionis testes idoneos subscripsimus, quorum nomina hec sunt: Cunradus Osnaburgensis episcopus, Burchardus Cameracensis episcopus, Gerardus Mersemburgensis episcopus; alii quoque principes: Arnolfus comes de Los, Teodericus comes, Gerardus comes, Paganus comes, Otto de Mares, Wilhelmus comes, Hermannus Piscis, Stephanus. Hoc etiam Mathildis Romanorum regina sua corroboravit presentia. Huius autem karte traditio facta est presente eiusdem ecclesie preposito Hildewino et obnixe petente. Et ut hoc nostre auctoritatis preceptum per futura tempora firmum et inviolabilem obtineat vigorem, manu nostra subter firmavimus et sigilli nostri impressione iussimus insigniri.

Signum domni Henrici quarti Romanorum imperatoris invictissimi.

Bruno cancellarius recognovit.

Data XI. kl. decembris, anno dominice incarnationis millesimo centesimo XVIIII, indictione XII, regnante Henrico quinto rege Romanorum, imperatore quarto; actum est apud Traiectum; in Christo feliciter amen.