In nomine sancte et individue trinitatis. Heinricus quartus Romanorum imperator augustus. Sicut deo disponente preesse constitutum est, ita indesinenter et prodesse pro re et tempore divina institucione amonemur. Quapropter communi principum consilio et hortatu ius civile et omnibus commune, quod tot annis odiosa questus diligencia Argentinensibus subtractum esse conspeximus, lacrimabili omnium rogatu sanctiori et, ut putamus, clemenciori consideracione restituimus, dampnum vero et ius consuetudinarium, non autem legitimum, et iugum Argentinensibus civibus inique et quasi quadam tyrannide aliquando impositum, sed a bone memorie Ottone predictorum civium episcopo aliquantulum levigatum, sub quo vini venditio a die sancto pasche usque in nativitatem sancte Marie per totam civitatem fiscum episcopalem respexerat, ita ut ab unaquaque venalis vini carrada due situle, quod nos teutonice amam vocamus, fisco episcopali persolverent, et divine remunerationis respectu et predictorum civium peticione absolvimus, absolvendo deinceps condonavimus, condonando regali nostra auctoritate firmavimus, exceptis sex ebdomadibus, quas episcopali fisco sub priori institucione reliquimus. Hanc ergo cartam si quis, quod non spero, infringere presumpserit, libras auri purissimi centum regali scrinio componat. Quod ut firmum et inconvulsum omni permaneat evo, hanc cartam inde conscribi testesque subscribi et sigilli nostri impressione iussimus insigniri. Huius autem regie traditionis testes idoneos infra notavimus; sunt autem isti: Cuno episcopus Argentinensis, Udalricus episcopus Eychstettensis, Rudolphus episcopus Basiliensis, Landolfus Cumanus, Gerhardus episcopus Mersiburgensis, dux Fridericus, frater eius Conradus, comes palatinus Gothefridus, comes Adelbero, Heinricus advocatus; Bruno cancellarius, Argentinensis ecclesie prepositus, Burchart decanus, Eberhart edituus, Rudiger archidiaconus, Hesso scholarum magister, Gerolt prepositus, Berhtolt, Dieterich ceterique confratres eorum; Sigefrit, Hug, Friderich, Hunbrech, Gebeno Odelrich, Otto, Burchart, Wolfram aliique eorum comparitatis perplures, quos enumerare longum est.

Data hec visa est regnante Henrico quarto dei gratia Romanorum imperatore augusto, anno MCXIX.

Hoc ego Bruno cancellarius recognovi vice archicancellarii Adelberti Moguntini.