Handschriftliche Überlieferung

Henricus dei gratia Romanorum imperator augustus Brunoni Treuirorum archiepiscopo gratiam et omne bonum. Bene nosti, ymmo inter alios principes regni tu ipse interfuisti, ubi ab omnibus in proxima confirmatum est curia, ut quisque spoliatus deberet recipere sua. Unde, quoniam abbati sancti Maximini parum adhuc profuerunt littere, quas pro eo tibi sepe misimus, ymmo parum ei profuit ipsa commendatio, qua eum manu ad manum et ore ad os commendavimus, rogamus, ut, sicut nos diligis, abbatia sancti Arnulphi eum reinvestiri facias et tam in hoc quam in aliis rebus benevolentiam tuam ei affectuosius ostendas. Rogamus etiam, ut de bonis suis in Luthardesdarren, unde fratres faciunt querimoniam de serviente tuo R., facias pacem et iustitiam. Vale.

Drucke

Henricus dei gratia Romanorum imperator augustus Brunoni Treuirorum archiepiscopo gratiam et omne bonum. Minime te latere potest, quid proximo conventu decretum sit, ut, cui ipse presens adfueris, dispoliatos nimirum omnes suis quemque restitui bonis oportere. Cum itaque abbati sancti Maximini literas a me crebro ad te missas parum adhuc intelligo profuisse adeoque studium meum, quo coram eum data dextra ac presenti sermone tibi commendavi, animadverto frustra fuisse, rogamus, ut, si nos diligis, ex abbatia sancti Arnulphi eum investias et tam in ea quam rebus quibusque ceteris cures, ut promptiorem in se tuum favorem benevolentiamque sentiat. Obtestamur quoque, ut litem de prediis in Lutharesdarren ab abbate fratribusque motam componas omniaque ad pacem et equitatem revoces. Vale.