H. divina favente clementia quartus Romanorum imperator augustus universis Placentinis maioribus et minoribus gratiam cum bona voluntate. Quia regalis honoris est sibi fideliter servientes clementer remunerare, notum omnibus esse volumus, quomodo populum Placentinum pro servicio nobis facto ac faciendo honoravimus. Quoniam enim ipsorum conscilio et auxilio castrum Bargone et Burgum Sancti Donnini recuperavimus et retinere debemus, theloneum apud Fl[or]en[tiol]am illis in benefitium concedimus et theloneum de Burgo Sancti Donnini illis remittimus, hac scilice[t ratio]ne et pacto, ut deinceps nobis eadem castra cum curtibus et reliquis ad ea pertinentibus pro viribus obtineant. Postea salvabimus et custodiemus eos et in personis et in rebus, sive in terra sive in aqua, que fuit comitisse Mathild[dis …, eo] tamen iure, quod eiusdem comitisse tempore obtinuit, nobis per omnia observato. Si autem illis contra ho[c] preceptum iniuria aut violentia fuerit illata, emendari faciemus aut, si emendatum non fuerit, adversariis ipsorum wuerram faciemus nec eis ullo modo reconciliabimus nisi ipsorum consensu et voluntate, quibus illata est violentia, aut secundum iustitiam vel consilium et peticionem consulum civitatis. Et si quis ipsis pro hoc nostro servitio wuerram aut bellum intulerit, nos ipsos omnibus modis iuvabimus et hostibus suis wuerram faciemus nec eam relinquemus nec umquam hostes ipsorum ad gratiam nostram nisi vel per iustitiam vel eorum interventu et conscilio admittemus. Insuper hoc laudavimus, ut legati nostri de predictis castris, scilicet Bargona et Burgo Sancti Donnini, Placentinis ferant auxilium contra omnes homines excepto imperatore et regina et eius certis nuntiis, ipsique Placentini in omni wuerra sua ad hec prenominata castra refugium habeant et presidium et receptaculum, quamdiu guerra facere voluerint. Et si in his legatis nostris mutacio aut defectus fuerit, quoscumque rursus ibidem restituerimus, eandem illis faciant securitatem.

Data Aquisgrani, VI. kl. maii. (+)