(SN.) Dum in dei nomine feria VII, que est XVI. kl. septembris, in episcopatu Uicentino, in loco Monticlo, scilicet in domo Tethelgardi, Heinricus dei gratia IIII. Romanorum imperator augustus in iudicio resideret ad iusticias faciendas ac deliberandas, adsistentibus coram eo fidelibus suis Hermanno Pisce, Conrado Sporlino, Azone Ferrariensi, Alberto Uicentino, iudicibus, Teutaldo, Vberto de Monte Chalda, Leua Asinos pluribusque aliis nobilibus viris presentibus, ibi in illorum veniens presentiam Petrus dei gratia monasterii sancti Felicis abbas unacum Parulfo advocato suo querimoniam deo dominoque imperatori fecit, ut iusticiam faceret [de] Rodulfo de Aimo, qui iniuste tres mansos in Liséra prefate æcclesię sancti Felicis tenebat. Ideoque, quod Rodulfus citatus venire ad iusticiam faciendam sprevit nec aliquem, qui pro eo responderet, mittere voluit, tunc iudicibus ab imperatoro (!) interrogatis, ut exinde sententiam proferrent, iudices autem predictos mansos monasterio sancti Felicis restituendos esse pronunciaverunt. Dominus vero imperator per iudicum consilium et per lignum, quod in manu tenebat, predictorum mansorum investituram prefato abbati suoque advocato Parulfo dedit et insuper suum bannum super predictum abbatem suumque advocatum et nominatim super prenominatam terram misit, ut nulla magna parvave persona eos vel monasterium sine legali iudicio de predictis mansis disvestire vel inquietare audeat. Qui vero hoc fregerit, centum libras auri se compositurum agnoscat, dimidium imperatoris camere et dimidium prefato abbati suisve successoribus. Actum est hoc anno dommi nostri Iesu Christi millesimo CXVIII, indictione XI.

+ Hoc signo crucis imperator hanc noticiam confirmavit.

Ego Azo iudex sacri palacii subscripsi.

(SN.) Ego Obertus domini Heinrici imperatoris iudex [i]nterfui et per eiusdem imperatoris preceptum hanc noticiam scripsi.