In nomine sancte et individue trinitatis. Heinricus divina favente clemencia quintus Romanorum rex. Auctoritate sanctarum scripturarum et maxime ex diversis verbis in ewangelio didicimus, quod domum dei, que ipso testante domus oracionis vocatur, nunc hilariter dando, nunc vota persolvendo, nunc iusticiam faciendo debemus honorare atque sublimare, ut hoc modo deum creatorem nostrum hic et in futuro propicium habere mereamur, cui servire vere regnare est. Cuius rei consideracione nostram pensantes salutem et successorum nostrorum ecclesie Corbeiensi subvenire in hiis, que necessario postulavit, decrevimus. Quapropter omnibus Christi nostrique fidelibus nunc et semper notum fieri volumus, qualiter nos causa dei et beatorum martyrum Stephani, Viti et Iustini et aliorum sanctorum, ob salutem nostram nostrorumque parentum, digno interventu Fritherici Coloniensis archiepiscopi, Burchardi Mimigardefordensis episcopi, Euerhardi Eistadensis episcopi, Benedicti Mutinensis episcopi, Heremanni comitis, Godefridi comitis, Sigefridi advocati, Ludwici comitis, Wicberti et aliorum nostrorum fidelium, et precipue digna peticione venerabilis Erkenberti abbatis officium, quod quidam Escelinus sibi pro hereditario beneficio vendicabat, iudicio contubernalium suorum ei ablatum congregacioni remisimus, et nisi predictus abbas cum fratribus suis intercessisset, digna ipsum ulcione pro iniusticia ei illata punivissemus. Quam abhominabili enim iniusticia hoc, non dico beneficium, sed maleficium, sibi vendicaverit, ipsius rei agnicio probabit: Omnem quippe annonam fratrum extracanonice addecimatam suscipiens adhuc decimabat et, quod scelestius est, eciam septimabat et hoc suum beneficium nefarie affirmabat. Omnibus igitur nostris fidelibus idem iniustum et sacrilegum acclamantibus et probantibus ipsum ex toto officium congregacioni remisimus et confirmavimus, ut prepositus loci iussu et consensu abbatis, qui pro tempore fuerit, provisorem annone fratrum, quem cauciorem iudicaverit, habeat, nec ipsi abbati vel cuiquam successorum eius seu alicui potestati magne vel parve idem commutare liceat. Qui vero hec temeraverit, pro contemptu regie maiestatis fisco nostro CCCta talenta persolvat. Ut autem hec nostre pietatis concessio omni evo inconcussa permaneat, hanc cartam inde conscriptam inpressione nostri sigilli iussimus insigniri.

Signum domni Heinrici quinti regis invictissimi. (M.6.)

Adelbertus cancellarius vice Rothardi Moguntini archiepiscopi et archicancellarii recognovit.

Data II. kl. octob., indictione XV, anno dominice incarnacionis MoCoVII, regnante Heinrico Vto rege Romanorum anno II, ordinacionis eius VIIIo; actum est Corbeie; in Christo feliciter amen.