(C.) In nomine sanctae et individuae trinitatis. Heinricus divina favente clementia quintus Romanorum rex. Notum fieri volumus omnibus Christi nostrique fidelibus tam futuris quam presentibus, qualiter nos causa dei et pro felici stabilitate regni nostri et ob ęternum remedium animę nostrę nostrorumque parentum, immo et pro dilectione clavigeri regni cęlorum et etiam digno interventu et humili peticione nostrorum dilectorum principum, Otthonis videlicet Babenbergensis episcopi, Bvrchardi Monasteriensis episcopi, Udonis venerabilis Hildenesheimensis ęcclesię pontificis, Livdigeri ducis, Herimanni comitis et aliorum multorum nostrorum fidelium, ęcclesię dei in honore beati Petri principis apostolorum constructę in loco, qui dicitur Helmwardeshvson, omnia bona tam prędia quam cętera adquisita nostrorum antecessorum regum vel imperatorum temporibus nostrique tempore successorumque nostrorum, quamdiu durabit seculum, adquirenda sibi, sive per precariam sive per emptionem sive per oblationem vel quolibet alio rationabili modo, per hanc preceptalem paginam concessimus ac iure perpetuo possidenda regia maturitate firmavimus. Dedimus quoque preceptum stabiliter regio more, ut nulla deinceps persona magna vel parva, cuiuscunque sit ordinis vel officii, audeat modo dictam ęcclesiam aliqua arte molestare vel inquietare vel tributum inde vel aliquod regale servitium exigere, sed per omnia et in omnibus ex regali concessione utatur perpetua libertate. Ut autem huius nostrę pietatis concessio ab omnibus credatur et stabilis et inconvulsa omni ęvo permaneat, hanc inde cartam conscriptam et manu propria corroboratam impressione nostri sigilli insigniri iussimus.

Signum domni Heinrici quinti regis Romanorum invictissimi. (M.5.)

Albertus cancellarius vice Maguntini archiepiscopi Rotardi archicancellarii recognovit. (SI.D.)

Data VII. kl. aug., indictione XIIII, anno ab incarnatione domini millesimo CVII, regnante Heinrico V. rege Romanorum anno III, ordinationis eius VIIII; actum est Goslarie; feliciter in Christo amen.