In nomine sanctę et individuę trinitatis. Henricus divina favente clementia Romanorum imperator augustus omnibus fidelibus imperii tam clericis quam laicis. Dignum namque et rationi consentaneum esse dignoscitur, ut, qui ad imperii regimen ex gratia divina assumpti sumus, eorum utilitatibus ac defensionibus et specialiter ecclesiis providere sollicite teneamur. Veniens ante nostram pręsentiam igitur Iohannes abbas monasterii sancti Donati levitę cum fratribus suis a nobis humiliter postulavit, ut monasterium ipsum, abbatem et fratres, monachos et conversos, cum universis ecclesiis, familiis, rebus, possessionibus omnibus ad idem monasterium pertinentibus sub protectione nostra recipere dignaremur. Nos autem attendentes supplicationem ipsius abbatis atque suorum fratrum iustam pariter et honestam pręfatum monasterium, abbatem et fratres et ecclesias omnes sibi subiectas eiusque familias, possessiones et generaliter omnia ad idem monasterium pertinentia amore omnipotentis dei et reverentia prędicti levitę pro remedio etiam animę nostrę sub imperii recipimus protectione. Item eidem abbati suisque successoribus confirmamus ex nostro edicto, ut prescriptione centum annorum suum ius sive dominium vel proprietas non tollatur. Si quis autem marchio, dux, comes, vicecomes aut aliqua potestas maior vel minor vel aliqua persona contra nostrum edictum ire vel agere pręsumpserit aut bona seu ecclesias sancti Petri in Pitullo et oratorium sancti Iohannis baptistę cum fundo Duliolo et oratorium sancti Saluatoris cum omni pertinentia sua et fundum, qui vocatur Casaldasi, sive omnes alias iamdicti monasterii possessiones seu possessores nomine dicti monasterii, partem vel totum, inquietare aut invadere tentaverit, vel quas decetero rationabiliter dictus abbas vel successores sui acquisierint, condemnamus ex parte nostra et aliorum imperatorum successorum, ut solvat pęnam centum librarum auri, medietatem camerę nostrę et medietatem camerę dicti monasterii, et post solutam pęnam hęc defensio maneat firma. Quod ut verius credatur, propria manu firmantes pręsentem paginam sigilli nostri impressione inferius iussimus sigillari. Testes autem fuerunt: Oddo abbas sancti Rofilii Populiensis et Albertus eius monachus et Luithaldus et Luithalfus et Iustatius et Odelbertus et Er[as]mus, Odiscalcus et alii plures tam Teutonici quam Latini.

Signum domini Henrici Romanorum imperatoris invictissimi. (R.)

Ego Brocardus sacri palatii imperialis cancellarius recognovi.

Acta sunt hęc anno dominicę incarnationis MCXVII, indictione X, regnante domino Henrico Romanorum imperatore serenissimo, temporibus Paschalis papę secundi, die decima quinta mensis decembris; data in loco Tolate iuxta castrum Laterculi territorii Corneliensis.